Самоубиството на Ентони Бордејн отвори многу дискусии: Депресијата – болест или мит?

Познатата ТВ фаца, шеф, патописец воден од храната и заштитен знак на Си-ен-ен, Ентони Бордејн (61), изврши самоубиство после долготрајната борба со депресијата. Борден го завршил својот живот на снимање во Франција, а бил пронајден мртов во хотелската соба на 7 јуни. Неговата смрт поттикна многу дискусии.

Дали депресијата е само поизразена меланхолија или тага или лошо расположение или вистинска болест поради невронските нарушувања во телото на луѓето кои страдаат од депресија – се вистинските теми за кои деновиве се дискутира во круг на научници, доктори, на социјалните мрежи…

Во последната година депресијата беше причина за смртта на шестмина славни луѓе и илјадници „обични“ луѓе. Пејачот Крис Корнел, диџејот Авичи, пејачот Честер Бенингтон, Долорес О’Риордан, Ентони Бордејн… се само некои од познатите медиумски личности кои решението и излезот за своите проблеми го побараа во самоубиство.

Според проценките на здравствените работници до 2020 година, депресијата би можела да стане втор најголем здравствен проблем во светот

Еве што велат конкретните податоци:

* 2/3 од луѓето со депресија не бараат помош која им е потребна (не одат кај психолог);

* 80 % од луѓето со клиничка депресија забележуваат подобрување во квалитетот на животот после лекувањето;

* Депресијата е приближно 2 пати почеста кај жените отколку кај мажите;

* Шансите за добивање на депресија се поголеми ако имате некој во блиско сродство со дијагноза на депресија;

* Над 90 % од оние што извршиле самоубиство имале некакво ментално пореметување;

* Депресијата станува се почеста кај помладите генерации (8,3 % од адолесцентите во САД страдаат од депресија).

• Депресијата често се меша или заменува со депресивно расположение. Депресијата спаѓа во групата на нарушувања кои се карактеризираат како нарушувања на расположението (униполарно нарушување). Тоа е тешка психофизичка состојба проследена со различни несакани пропратни ефекти.

Депресивното расположение се карактеризира со повлекување на лицето во себе, потиштеност, пад на виталноста, несоница, губење на апетит, опседнатост со црни мисли, бавен процес на размислување, безнадежност и беспомошност.

Лекувањето на депресијата во 90 % од случаите се сведува на ангажман на депресивното лице. Овие се најбезбедни и најефикасни чекори за самопомош на депресивните луѓе:

Престанок на негативните мисли;

Повеќе дружење со луѓе без депресивни проблеми и луѓе кои ќе ја поттикнат депресивната личност на соработка и ангажман;

Престој во природа и поврзување со „телесниот часовник“ и сончева светлина, природни извори на енергија;

Вежбање, трчање, пливање, работа, каква било физичка активност на поинаков начин ги активира хемиските процеси во мозокот;

Доволно сон и регулација на спиењето.