Во нашите прсти, велат, се наоѓаат густо наредени нервни завршетоци, а тоа е заслужно за силната болка кај повредите, па дури и толку малите како што е исеченицата од хартија. Освен тоа работ од хартијата на некој начин е „назабен“, па резовите се такви што им треба повеќе време да зараснат – а тоа може да се забележи ако работ од хартијата се погледне под микроскоп. Елементот на изненадување кај повредите со хартија може да биде една од причините зошто болката ја чувствуваме посилно од кога, на пример, ќе се исечеме со нож.
„Постои психолошки елемент на изненадување затоа што се се случува брзо, па немате време да ја повлечете раката. Исто така, бидејќи не очекуваме повреда од хартија, тоа чувството на болка го прави поинтензивно. Додека ракуваме со нож сме внимателни затоа што знаеме дека постои опасност, но со хартијата не е така“, смета американскиот дерматолог, доктор Хејли Голдбек од „UCLA Health“ медицинскиот центар.
„Тоа е нешто што главно се случува на прстите од раката. Луѓето имаат нервни завршетоци по целото тело, но на местата како што се врвовите од прстите или усните нивната густина е голема. Тие нервни завршетоци се познати како ноцицептори и тие испраќаат сигнали до мозокот за работи кои би можеле да предизвикаат оштетувања на кожата, како екстремна топлина, голем студ или некои хемикалии“, објаснува доктор Голдбек.
Додава и дека една од причините зошто на исеченицата од хартија и требаат дури по неколку дена да зарасне, би можело да биде и тоа што се наоѓа на рацете со кои постојано нешто правиме, па раната константно се отвора.
„Освен тоа и самиот раб од хартијата е по малку „назабен“, па ја сече кожата и пред да сфатите што се случува. Таквата исеченица не е мазна и и треба повеќе време да зарасне. Исто така, со оглед на тоа дека хартијата е направена од дрвени пулпи, памук или други влакна, ситните делови можат да останат во раната и да доведат до воспаление. Затоа е важно таквата исеченица веднаш да ја измиете“, додала и уште напоменала дека не би требало да се верува на старите приказни за тоа дека раната најдобро би било да се остави отворена за да се создаде краста и така побрзо да зарасне. Таа советува дека е подобро раната да се држи влажна и под завој или фластер.
„Раните би требало да бидат влажни кога зараснуваат, тоа им помага во побрзото зацелување, оштетените клетки побрзо се заменуваат со нови. Освен тоа, раните се помалку болни кога се влажни“, напоменува доктор Голдбек.
