ОМИКРОН ПОБЛАГ СОЈ ОД ОЧЕКУВАНОТО?
Според една студија од Англија, новата варијанта на коронавирусот, позната како омикрон, во 20 до 25 отсто од случаевите помалку води кон болничко лекување, отколку што е тоа случај со делта мутацијата. Експериментите во лабораториите покажуваат дека омикрон има помала способност за инфицирање на клетките на белодробното ткиво.
Иако се уште треба да се почека дали наодите ќе се потврдат и во пракса, се укажува на тоа дека омикрон ќе биде поблаг од очекуваното. Но, ќе се шири побрзо бидејќи поради бројните мутации на т.н. шилест (spike) протеин често го заобиколува имунитетот што сме го стекнале со ревакцинација или со тоа што сме ја прележале првата варијанта на вирусот.
Една шкотска студија покажува дека ризикот од одење во болница при омикрон е дури за две третини понизок, и дека оваа варијанта практично не предизвикува посилни симптоми кај лица помлади од 60 години. Во таа студија исто така се покажува дека бустер дозата вакцина – значи трета доза – во огромна мерка штити од симптоми.
Во прилог на ова доаѓа и студија од австралиста област Нов Јужен Велс. Таму, речиси сите се вакцинирани и омикрон испраќа луѓе во болница двојно поретко отколку делта. Научниците сепак предупредуваат дека опасноста лежи во тоа што омикрон е значајно повеќе заразен сој. Дури и ако самиот проток на болеста е поблаг, ако во кус рок се инфицираат голем број луѓе, тоа ќе биде доволно да се преполнат болниците.
СЕ БЛИЖИ КРАЈ НА ПАНДЕМИЈАТА?
Некои веќе прогнозираат дека омикрон полека, но сигурно носи крај на пандемијата. Бидејќи оваа варијанта е попаметна и еволутивно посупериорна во однос на делта. Тоа значи дека побрзо се шири, но поретко ги убива своите домаќини. Наскоро омикрон варијантата треба да го земе приматот во однос на делта.
Иако вирусот нема брзо да биде искоренет, можеби дури и никогаш, големи се шансите да стане ендемски. Тоа би значело да нема пандемија, но дека ослабената верзија на вирусот ќе се појавува тука и таму, локално и сезонски – исто како грипот во зима. Од тоа тогаш би се штитело како од грипот – со годишна вакцинација.
Добри вести се што производителите на вакцините тврдат, а и првичните студии тоа го покажуваат, дека бустер дозата добро штити од омикрон. Неодамна одобрената протеинска вакцина дава голема надеж бидејќи многу лица кои се скептични наспроти новата Мрна технологија, избегнуваа вакцинација, па сега ќе може да се заштитат на овој начин.
ПРВА ТАБЛЕТА ПРОТИВ КОРОНАВИРУС
Фармацевтската компанија Фајзер деновиве излезе со позитивна информација дека Агенцијата за лекови во САД издала итно одобрување на нивната таблета против коронавирусот. Една меѓуанализа покажала дека лекот ја намалува стапката на смртни случаи за 89 проценти.
Овој лек всушност го стопира размножувањето на вирусот. Секој кој е болен зема апче дома, два пати дневно, вкупно пет дена, а во комбинација со еден друг препарат. Целта на тој лек е да се избегне сериозен тек на болеста и да се спречи евентуално хоспитализирање.
Во тек е постапка за одобрување пред Европската агенција за лекови. Оттаму велат дека таблетите би можело да се препишуваат на возрасни пациенти на кои не им треба дополнителен кислород, а имаат зголемен ризик од тежок тек на болеста.
Производството нема да биде масовно, а лекот е скап. Американските власти имаат нарачано десет милиони пакувања од овој лек за околу пет милијарди долари.
