Нездравата храна, цигарите, недостатокот на физичка активност, стресот, вродените мани, но и генетиката влијаат на тоа се поголем број млади луѓе да се соочуваат со кардиоваскуларни проблеми. Иако некогаш важеше правилото дека тегобите од овој тип се јавуваат подоцна во животот, денес статистиката е сосема поинаква, па и младите би требало да посветат внимание на одредени симптоми. Пулсот кој надминува 80 отчукувања во минута, аритмии, прескокнувања, тоа се знаци дека треба да се појде на лекар, но и не треба да се паничи затоа што може да се само моментални тегоби.
Кардиолозите објаснуваат дека лошите навики и генетиката најчесто влијаат на развојот на кардиоваскуларните болести кај младите. Секако, не треба да се заборават ниту современиот начин на живот, нередовната исхрана, брзата храна која е полна со сол и маснотии, сменетиот режим на живот (биоритам) надополнето со намалена физичка активност …, а кои влијаат на излачувањето на хормоните што инаку ги контролираат основните функции на организмот.
Најдобра превентива се редовните прегледи
Честа тема е изненадната смрт кај младите спортисти заради ексцесивните режими на тренирање без јасна здравствена контрола. Затоа е мошне важно, па дури и кај рекреативците, да се контролираат без оглед на тоа дали имаат некаков проблем или не. Меѓу младите голем проблем е и дебелината за што во голема мера придонесува пасивниот начин на живот, но и лошата исхрана. Според кардиолозите, потребно е да се прави редовна контрола на крвната слика, пред се, на нивото на холестерол, потоа на крвниот притисок и да се направи ЕКГ.
Во ризичната група спаѓаат оние кои во семејството имаат личност што во младоста имала кардиоваскуларен проблем.
Не е секоја болка проблем, но ако имате вишок килограми, сте под психичко оптоварување, имате висок притисок или генетски предиспозиции – внимателно!
Ладна вода после физичка активност – НЕ!
Лекарите предупредуваат дека треба да се внимава со пиењето ладна вода, од фрижидер, после физичка активност. Истото важи и за енергетските напитоци, кафето во големи количества, но и масната и презачинета храна.
Што помага во превенцијата?!
Брзото одење е исклучително здрава навика како превенција кога станува збор за срцевите болести. Шетањето има ефект и во лекувањето на најтешките болни со срцева слабост, 45 минути дневно се одлични и во тераписки и во превентивни цели.
СИМПТОМИ КОИ НЕ СМЕЕТЕ ДА ГИ ИГНОРИРАТЕ – без оглед на полот, возраста, дали некогаш сте имале проблем со срцето…
- Болка во градите;
- Болка во рамото, левата рака која се шири кон долната вилица;
- Претходните симптоми придружени со мачнина или повраќање, гушење, ладна пот, вртоглавица, отежнат говор и замаглен вид.
СОВЕТ ПЛУС – оставете ги цигарите
Сите облици на срцеви болести и болести на крвните садови, од аритмија, слабеење на срцевиот мускул, инфаркт или шлог, можат да бидат поврзани со пушењето. Оваа штетна навика генерално го намалува имунитетот и ја зголемува склоноста кон воспаленија. Само една година по откажување од цигарите ризикот од шлог и инфаркт драстично се намалува, а за две години ризикот е речиси ист како и кај непушачите.
