“КОВИД јазик“ идентификуван е како уште еден необичен симптом на оваа болест, информираа лекари кои го следат ширењето на вирусот.
Епидемиологот Тим Спектор од Кралскиот колеџ во Лондон кој ја предводи студијата за симптомите предизвикани од новиот коронавирус, на својот Твитер профил објави непријатна фотографија која ги прикажува последиците од инфекцијата. Тој вели дека заболените пријавувале и чиреви во усната шуплина.
“Едно од петмина заразени лица, се уште има помалку вообичаени симптоми кои не се наоѓаат на официјалната листа – како кожниот осип. А, во последно време се среќаваме со се поголем број на КОВИД јазик и необични чиреви во усната шуплина.
Габриел Скали, претседател за епидемиологија и јавно здравје при Кралското медицинско здружение вели дека слични симптоми веќе извесно време се поврзуваат со КОВИД-19.
“Вирусот е проблематичен за лекување оти предизвикува последици од толку голем обем и на различни делови од телото. Медицинскиот назив за отечен јазик е глоситис, а вклучува и “малинест јазик“ , а се јавува кај различни состојби, односно болести како херпес вирусот кој го напаѓа нашиот имун систем“, појаснува Скали.
Промените на јазикот вклучувајќи болка, промена на бојата, отекување или необична текстура, понекогаш може да бидат последица на главната болест, а не само нехигиена на усната шуплина.
На пример, белиот јазик често е само наслаги на храна, бактерии и мртви клетки, но може да биде знак за орална кандидијаза, хормонални промени, недостаток на витамини, а британскиот Национален здравствен сервис советува во таков случај да се јавите кај својот матичен лекар.
Кралскиот колеџ во Лондон забележал многу ретки симптоми кои не се на списокот на Националниот здравствен сервис. Едно од пет инфицирани лица со коронавирусот има кожен осип, а еден од најчудните симптоми поврзани со промени на кожата се “КОВИД прсти“ – црвенкасти или виолетови израстоци на прстите на рацете и нозете, кои се чувствителни, чешаат и/или создаваат чувство на жарење, што почесто се случува кај помладите пациенти и се појавува подоцна по развој на болеста, а може да потрае со недели.
Уште некои од необичните симптоми на КОВИД-19 се губење на слухот и конјуктивитис.
