Иако вакцината се уште не стигната, постојат многу прашања, недоумици и нејаснотии. Ова се одговорите на Министерството за здравство (МЗ) на најчестите прашања поврзани со вакцината против КОВИД-19.
Зошто вакцина наместо лек?
МЗ: Вакцинацијата е признаена како една од најуспешните и најекономични здравствени мерки во светот. Таа спасува милиони животи. Со воведувањето на вакцинацијата како мерка за заштита од заразни болести, постигнати се најдобрите резултати во историјата на медицината. Вакцините се лек. Тие се произведуваат во опкружување и процес кој подлежи под многу контроли.
Колкава количина вакцини против КОВИД-19 се нарачани и од кои производители?
МЗ: Веќе се обезбедени 833 илјади вакцини против КОВИД-19 вирусот за 400 илјади граѓани преку КОВАКС механизмот. Тоа е механизам на Светската здравствена организација, Глобалната алијанса за имунизација во коишто учествуваат сите соседни земји, освен земјите членки на Европската Унија кои имаа можност за директни договори со некои компании. Во рамките на овој систем ќе ги добиваме вакцините согласно планот за дистрибуција којшто КОВАКС ќе го одреди.
- Покрај овој механизам, доставени се барања за директни договори за вакцини до две светски компании Астра Зенека и Фајзер. Фајзер одговори на дописот на Министерството за здравство дека може да отпочнат директни преговори за набавка на вакцина од компанијата производител.
- Оваа недела се очекува одговор и од Астра Зенека, што ќе значи дека преку овој механизам со директна комуникација со комапаниите производители ќе се преговара за да се обезбедар дополнителна количина на вакцини. Третиот механизам, е преку земјите членки од ЕУ, заради тоа што во нивните договори освен за нивните граѓани, имаат една количина која е наменета за останатите земји кои не се членки на ЕУ.
Како ќе се спроведува планот на вакцинација во Р.С. Македонија?
Почнати се интензивни подготовки за процесот на вакцинација од КОВИД-19, со цел да го припремиме здравствениот систем за ефикасен начин на вакцинација. Станува збор за безбедна вакцина, а со вакцинацијата ќе се подигне имунитетот на населението насекаде во светот и животот ќе се врати во нормала.
Формирано е специјално координативно тело кое ги анализира сите аспекти на вакцинацијата – прием, чување, дистрибуција и практичната апликација на граѓаните.
Кои се приоритетни групи за вакцинација и кој ќе мора да се вакцинира?
МЗ: Правилото за примање вакцина, како за сите други вакцини така и за ковид вакцината, е да истата се прими во општа добра здравствена состојба. На приоритетната листа за вакцинација први ќе бидат здравствените работници кои работат со ковид пациенти, како и ризичните групи граѓани со зголемен ризик за Ковид 19, за кои вакцината ќе биде високо препорачана, но не и задолжителна.
Која ќе биде цената на вакцината, дали граѓаните ќе ја плаќаат истата?
МЗ: Ковид вакцината ќе биде бесплатна за граѓаните.
Како ќе се следи безбедноста на вакцината, каде ќе се врши имунизацијата и дали вакцината ќе биде безбедна?
МЗ: Во делот на чувањето на вакцините ќе се користат магацините на економските оператори каде и сега се чуваат вакцините, единствено нешто што ќе биде додаток се фрижидерите на -70 степени за еден тип од вакцините. Фрижидерите ги добиваме како донација од американска фондација со која што имаме долгогодишна соработка и тие фрижидери ќе бидат тука веќе од јануари. Практично ќе бидат поделени кај сите економски оператори. Оттука тргнува процесот на дистрибуција кој е еднаков каков што е и сега за сите други вакцини, до сите ЈЗУ-а кои имаат пунктови за вакцинација, тоа ќе бидат Здравствените домови, ЦЈЗ и болници. Лекарите здравствениот персонал, медицинските сестри сите вработени кои што треба да се вакцинираат ќе се вакцинираат на местата каде што работат. Вакцинацијата ќе ја спроведат веќе искусни лекари и медицински сестри за кои ќе бидат направени дополнителни обуки. За сите овие вакцини коишто се сега на располагање, здравствените работници веќе имале искуство од други вакцини коишто се со сличен тип.
