Додека некои се вратија на работните места, многумина уште од март работат во своите четири ѕида. Работењето од дома, повторно се актуелизира, поради се поголемиот број на новозаразени секој ден. Иако работење од дома се чини како многу подобра и поелсна опција, луѓето понекогаш забораваат дека и натаму имаат право на пауза и дека тоа е идеално време да го искористат поквалитетно од вообичаено, додека биле во канцеларија и главно десетина минути трошеле на брзинско кафе и пауза за цигара.
Стручњаците направиле листа на активности кои може да ги правите кога ќе се оддалечите од работната маса, хартиите и компјутерот.
ЈАВЕТЕ КАЈ ПРИЈАТЕЛ
Одвоеноста од колегите, влијае и на намалена интеракција. Паузата за ручек е соодветно време да повикате пријател и да поразговарате со некого. Тоа сигурно ќе ве расположи и ќе ве мотивира за понатамошната работа.
РАЗМРДАЈТЕ СЕ
Поголем дел од денот го минувате пред компјутер и на работна маса, што никако не е добро за телото, особено за ‘рбетот. Додека сте оделе во канцеларија, не сте можеле за време на паузата да се раздвижите и да направите некој брз тренинг, но сега ја имате таа можност. Излезете на прошетка 15 до 30 минути, направете јога тренинг или лесно размрдајте се.
СРЕДЕТЕ ПО ДОМА
Сега веќе не мора да чекате викенд за да можете се темелно да исчистите, оти по долгиот работен ден немате ниту волја, ниту сила. Земете си куси паузи по извршената работа и расчистете ја собата, измијте садови, поминете со правосмукалка или избришете прашина. Важно е својот простор да го одржувате уреден, така ќе ја зголемите мотивацијата и ќе го намалите стресот.
ИЗГЛЕДАЈТЕ СЕРИЈА
Стручњаците велат половина час да ги искористите за гледање серија која ќе ве опушти и накратко ќе ве натера да заборавите на сите обврски.
НАВЕДЕТЕ ТРИ РАБОТИ НА КОИ СТЕ БЛАГОДАРНИ
За време на паузата може да подготвите ручек – сега конечно не мора да јадете готова храна или печива. Додека јадете, размислете за работите на кои сте благодарни и кажете ги на глас. Тоа ќе ви помогне да го намалите стресот и грижите.
ДРЕМНЕТЕ
Кусото попладневно спиење од 20 до 30 минути ќе ви обезбеди многу енергија. Тоа е многу подобра опсија од спиење од еден до два часа, по кое тешко доаѓате на себе и всушност сте повеќе уморни.
