Гана потврди два случаи на смртоносниот вирус марбург, односно многу заразна болест што ја предизвикува вирус кој припаѓа на истата фамилија на вируси како и оној што предизвикува ебола.
Како што информираа од болницата во јужниот регион Ашанти, двацата зараени пациенти починале. Анализата на примероците покажала дека се работи за вирусот марбург, а истото го потврдило и тестирањето во Сенегал. Во моментов 98 лица се наоѓаат во карантин поради сомнеж за контакт со починатите.
Вирусот го пренесуваат лилјаци
За вирусот марбург не постои лек, но лекарите велат дека консумирањето многу вода и третирањето на специфичните симптоми ги зголемува шансите за преживување. Вирусот на луѓето преминал преку овошните лилјаци, а меѓу луѓето се пренесува со телесна течност. Симптомите вклучуваат висока температура, главоболка, болка во мускулите, повраќање крв и крварење. Владините служби ги повикаа граѓаните да се држат подалеку од пештери и добро да го печат месото прред консумирање.
Овошните лилјаци кои на луѓето го пренесоа вирусот познати се и под името “летечки лисици“ , нивниот распо на крилата може да достигне и 170 сантиметри. Нивното име доаѓа од фактот што главно се хранат со овошје, а живеат во тропските области на Азија, Австралија, Источна Африка и на островите во Индискиот и Тихиот океан.
Во Африка, овој вирус претходно бил забележан во Ангола, Конго, Кенија, Јужна Африка и Уганда. За прв пат се појавил во градот Марбург во Германија во 1967 година, кога починале седум лица. Овој вирус бил најсмртоносен во Ангола во 2005 година, при што вирусот усмртил над 200 лица.
