![3](https://panacea.mk/wp-content/uploads/2022/07/3-6-696x464.jpg)
Голем број луѓе имаат проблеми со жолчката, мал орган со крушковидна форма кој е сместен под црниот дроб. Најчестиот проблем што се јавува е жолчниот камен, а речиси секое десетто лице има камења во жолчката, кои во повеќето случаи се комплетно безопасни. Според статистиката се јавуваат кај 20 проценти од жените и 10 проценти од мажите.
Жолчните камења претставуваат наслаги слични на кристали во жолчното кесе. Тие можат да бидат со различни текстури и големини, а може да има само една или повеќе. Проблеми обично предизвикуваат камењата кои ќе се поместат и го блокираат жолчниот канал или заедничкиот жолчен канал кој се спојува со панкреасниот канал, што пак може да доведе до негово воспаление. Ретка, но многу опасна појава е ако камењата во жолчката го блокираат преминот од тенкото во дебелото црево, што предизвикува постојано повраќање. И во овој случај, правилната исхрана е најдобрата превенција. Храната богата со растителни влакна и малку маснотии им помага на жолчните камења да останат во течна форма. Бидејќи проблемот често останува недијагностициран долго време, важно е симптомите да се препознаат на време.
Доколку забележите некои од симптомите, задолжително јавете се кај лекар.
БОЛКА ВО СТОМАКОТ
Честата болка која периодично се јавува во пределот на црниот дроб е чест симптом на камења во жолчката, а најчесто се јавува после оброк, наведува гастроентерологот д-р Едвард Левин. Болката може, но не мора да се појави после секој оброк, но почесто се активира по обилни и масни оброци. Ако болката трае со часови, се работи за потешка форма, а доколку се јавува додека јадете, тоа веројатно не е симптом на оваа болест.
НЕ ПОМАГААТ ЛЕКОВИ ПРОТИВ БОЛКА
Ако болката, блага или силна, не се намалува откако сте земале таблета, можно е да се работи за симптом на камења во жолчката. Симптом може да биде и ако болката престане кога ќе се свртите на друга страна. Д-р Левин наведува дека ова се се важни информации за поставување дијагноза.
ЖОЛТИЦА
Тоа е симптом на проблем со црниот дроб, кој се манифестира со жолтило на кожата и белките на очите, заедно со појава на темна урина и светло обоени столици. Честа е кај децата, но исто така е показател за проблеми со жолчното кесе.
МАЧНИНА
Многумина ќе ги помешаат проблемите со жолчните камења со дигестивни проблеми. Д-р. Нил Јанг, гастроентеролог, наведува дека пациентите често мислат дека се работи и за болки после тренинг. Но, гадење и повраќање кои што се јавуваат со болка после оброк може да бидат симптоми на камења. Доколку се појават, веднаш побарајте лекарска помош.
ПАНКРЕАТИТИС
Доколку дојде до воспаление на панкреасот, задолжително треба да посетите лекар поради камења во жолчката, бидејќи панкреасот се наоѓа веднаш до црниот дроб и во истото подрачје ги складира дигестивните ензими. Ако се формира камен и се заглави во каналот на панкреасот, може да дојде до воспаление и болка, а ако тоа се случи, камењата мора веднаш да се отстранат.
НАГЛИ ПРОМЕНИ ВО ТЕЛЕСНАТА ТЕЖИНА
И ова е проблем поврзан со камења во жолчката, но не мора нужно да биде симптом. Обично прво се појавуваат проблеми со тежината, а потоа и со жолчното кесе. И додека губењето на вишокот килограми може да биде превентивно, екстремно брзото губење на тежината може да ве направи подложни на болести.
ЧУДНИ ТВОРЕВИНИ
Бидејќи се работи за шуплив орган, камењата во жолчката во текот на прегледот со ултразвук може да се прикажат како маса што не припаѓа таму. Постојат безболни тестови со кои може да се провери што е во прашање – лекарите ќе ја проверат големината на жолчното кесе и дали има воспаление.
Болка во десната страна е чест симптом на заболување на жолчното кесе, а понекогаш симптомите за кои мислите дека откриваат такви проблеми всушност може да бидат болести на срцето или белите дробови.
“Особено кај жените, може да се појават атипични симптоми на срцев удар или други кардиоваскуларни проблеми, па болката често се јавува во стомакот, а не во градите“, вели д-р Јанг.
Воспалението на бели дробови исто така може да се манифестира како болка во горниот дел на стомакот, а ако се јави температура и треска може да значи и дека дошло до акутно воспаление на жолчното кесе поради инфекција, а не поради камења. Овие симптоми може да откријат дека се работи за итна потреба од лекарски преглед и можеби зафат. Накратко, ако се јават било какви симптоми кои не поминуваат, секако мора да се обратите кај лекар поради преглед.