Нeврологот Николас Шиф од Медицинскиот колеџ „Вал Корнел“ во Њујорк е еден од водечките светски експерти за нарушувања на свеста, а многу од неговите пациенти се во вегетативна состојба и се без свест за себе или светот околу нив – барем досега така мислевме. Во 2006 година за првпат беше откриено дека една жена за која се верувало дека е во кома, всушност е свесна, пишува New Scientist. Откако лекарите и го скенирале мозокот, сфатиле дека може да замислува разни работи или настани по барање.
Невролозите тогаш откриле нешто што на прв момент делувало прилично застрашувачки – нашата способност да утврдиме дали е некој свесен или не врз основа на набљудување на самото однесување не е доволно прецизна. Сега знаеме дека некои пациенти имаат т.н. прикриена свест, при што во некои моменти се свесни, а во некои не се, но не се способни да го придвижат телото. По десетгодишно истражување, невролозите откриле дека тоа не се индивидуални случаи, туку дека многу пациенти во кома би можеле да имаат таков вид на свест.
