Одредени секојдневни навики имаат огромно влијание на здравјето и виталноста на коските. Ова се најчестите навики кои всушност може да доведат до слабеење на коскеното ткиво.
Седење пред телевизор
Предолгото седење или лежење ги прави мрзливи коските. Вежбањето е идеална замена за тоа. Најдобро за коските е кога сте во исправена положба, па вашите стапала и нозе ја држат целата тежина на телото, а вашите мускули и коски се активни и се борат со гравитационата сила.
Премногу сол
Со внесувањето сол, телото го губи калциумот, така што колку повеќе сол, толку помалку калциум имате. Намалете го внесот на сол во секојдневната исхрана, и избегнувајте храна од типот на чипсови, солени сирења, брза храна кои содржат премногу сол.
Возење велосипед на долги патеки
Возењето велосипед го зајакнува срцето и белите дробови, но не и коските. За подобрување на цврстината и густината на коските, лекарите го препорачуваат пешачењето или трчањето како поефикасно. Доколку сте страстен велосипедист, тогаш пробајте да ги комбинирате спортските активности, па вметнете тенис, пливање, танцување во спортската агенда.
Канцелариска работа
Сончевите зраци го помагаат создавањето на витаминот Д во организмот. Доволно е 10-15 минути дневна изложеност на сонце за да имате здрави коски. Но, проблемот е што најголемиот дел од времето го минуваме во затворен простор и го пропуштаме сонцето. Исто така, создавањето на витаминот Д со помош на сонцето зависи и од возраста, тенот, годишното време.
Алкохол
Високите дози алкохол се штетни за коскеното ткиво. Алкохолот ја намалува способноста на организмот да го апсорбира калциумот.
Цигари
Пушењето цигари ја намалува способноста на организмот да создаде ново здраво коскено ткиво. Кај пушачите периодот на зараснување на коската при скршеници трае подолго време и потребен е подолг третман. Откажувањето од оваа лоша навика, ќе ви помогне да го подобрите здравјето на коските.
