Деновите најчесто ги поминуваме по одреден терк, односно некоја востановена рутина водејќи се според одредени навики за кои притоа и не ни размислуваме. А всушност треба да се има предвид фактот дека иако некои активности ги правиме секојдневно, не значи дека се добри за нашето здравје.
Будењето тешко ви оди од рака – ако спаѓате меѓу оние кои спијат премалку и наутро по неколку пати го одложувате алармот, треба да знаете дека така само се измачувате и станувањето и будењето ви паѓаат уште потешко.
Првата работа што ја правите наутро е пиење кафе – науката вели дека пиењето кафе не е најдобрата опција за расонување. Наутро нивото на кортизол е природно високо, а кафето ова може да го наруши. Најдобро е првиот филџан да се испие кога почнува да опаѓа нивото на кортизол.
Не појадувате – Една од најголемите грешки без разлика дали сте на „диета“ или едноставно немате време, зашто појадувањето помага во поттикнување на метаболизмот и согорувањето калории.
Седите неправилно – седењето е уште една од оние навики коишто ги правиме по автоматизам. Така е бидејќи не ни размислуваме за ова, па многумина од нас седат згрбавени и со искривен ’рбет, што може да донесе низа проблеми.
Подигање на нозете – откако ќе си дојдете дома после тежок ден ги поткревате нозете на високо за да ги одморите, а всушност грешката ја правите кога не ги подигнувате нозете доволно високо. За да има ефект нозете треба да бидат поткренати над висината на срцето.
Дишење – сите знаеме дека кога вдишуваме воздух тоа треба да го правиме низ носот (таму воздухот се прочистува и затоплува), а треба да се дише од стомакот, а не од градите. Само така вдишувањата и издишувањата се доволно длабоки за да се внесе доволно кислород.
Туширање и миење на косата – сите се тушираме секојдневно, некогаш и повеќе од еднаш. Тоа всушност и е проблем и не е препорачливо бидејќи претераното туширање може да ја наруши природната влажност на кожата и да предизвика сува кожа. Истото важи и за косата, која со прекумерно миење може да стане сува и кршлива.
Миење на рацете – оваа навика сите сме ја стекнале во најраното детство, но дали ја изведуваме правилно. Процесот на миење раце треба да трае најмалку 20 секунди, што е оптимално време за да се уништат бактериите.
