Селфиманијата не влијае само на менталното, туку и на физичкото здравје, а лекарите откриваат дека се повеќе млади луѓе, на возраст меѓу 18 до 35 години, пријавуваат здравствени проблеми кои се директно поврзани со констатно правење селфи фотографии. Се работи за таканаречениот селфи зглоб, односно одреден вид на синдром на карпален тунел. Главните симптоми се силна и остра болка и трнење на зглобовите, рацете и прстите. Синдромот се лекува со физикална терапија, лекови и фиксирање на зглобот, а во екстремни случаи е потребна и операција.
Лекарите истакнуваат дека заради претераната употреба на телефонот, односно постојаното вртење на зглобот и виткањето на раката навнатре, со цел да се најде совршен кадар, влијаат на нервите на дланката и доведуваат до воспаленија и развој на синдромот. Затоа ако почувствувате болка во зглобот, трнци во прстите и дланките или имате чувство дека рацете ви се втрнати, можеби е време малку да го оставите телефонот настрана.
Лекарите советуваат, освен што треба да заборавите на телефонот, да вежбате за да го намалите притисокот на нервите во рацете.
И не е ова единствениот проблем заради мобилните телефони. Лекарите забележале уште една појава, односно таканаречениот Ајфон палец, односно воспалителни промени на палецот на раката кај личности кои често ’чукаат’ со палецот и телефонот го држат во иста рака. И ним им се препорачува пауза и размрдување на дланката и рачниот зглоб со цел да се намали притисокот на нервите и да се избегнат потенцијални воспаленија.
