Имаат неодолив изглед, пријатен мирис и прекрасен вкус, овошје кое е истовремено и здраво и лековито. Несомнено станува збор за јагодите (Fragaria), кои се дел од фамилијата на рози (Rosaceae), јагодесто овошје, преполно со изненадувања.
Интересно е што јагодите се единственото овошје чии семчиња не се скриени во плодот, туку се наоѓаат надвор.
Лековити својства
Лековитите својства на јагодите се познати уште од античките времиња. Освен плодот, за лекување може да се користи и коренот и листот на јагодата.
Чајот од листови од јагода со векови се користел како лек против стомачни тегоби, воспаление на грлото, грип, настинка, како и лекување на болки во коските.
Се приготвува на следниов начин: 2 полни супени лажици сушени листови од јагоди се прелеваат со 250 мл врела вода. По 15 минути чајот се процедува. Се пие три пати дневно по една шолја после јадење. Можете да го користите и за правење гаргара.
Доколку сакате да го исчистите организмот од токсини, за вечера консумирајте порција од јагоди (без додаток на шеќер), па наутро кога ќе се разбудите ќе бидете свежи и полни со енергија.
Доколку имате главоболка не посегнувајте веднаш по аспирин бидејќи за разлика од аспиринот, кој содржи ацетилсалицилна киселина, јагодите содржат природни салицилати и имаат својства на аналгетици. Десетина јагоди ќе делуваат исто како и таблетата.
Благодарение на портиввоспалителното, антипиретско и антибактериско својство, јагодите помагаат во ублажување на воспалителните процеси, во намалување на висока температура и при болки во мускулите.
Јагодите содржат големи количини на витамин Ц, влакна, калиум, магнезиум, железо и фолна киселина, која, меѓу другото, им е потребна на трудниците и на жените кои планираат бременост.
Јагодата е најдобро да се јаде свежа, незасладена, а може да ја консумираат и дијабетичарите
Јагодите можат да помогнат во зајакнување на имунитетот, кај заболувања на жолчката и црниот дроб, како превенција од стомачни болести, кај артритис и реума, при опоравување по болести, во лекување на анемија, кај камен во бубрегот, кај зголемен крвен притисок и холестерол.
Јагоди за совршен изглед
Јагодите може да се користат и за разубавување, бидејќи ја чистат и зацврснуваат кожата, благодарение на витаминот Ц и А и ја одржуваат кожата сјајна и затегната. Доволно е еднаш или двапати неделно да се стават на лицето (јагоди исечкани на кругови или кашеста маска), а потоа да се измие лицето, најпрво со млака, а потоа со ладна вода.
За вашите заби да изгледаат блескаво бели, истријте ги забите со јагоди со што ќе ги отстраните забните наслаги
Женската популација сигурно ќе ја развесели податокот дека јагодите можат да помогнат и во борбата против целулитот.
Витамините Ц и А кои се антиоксиданти го успоруваат стареењето и губењето на еластичноста на ткивата, ги уништуваат слободните радикали, а со редовна консумација на јагоди се забрзува циркулацијата.
Доколку имате проблем со вишокот на килограми, ќе ве израдува веста дека јагодите го забрзуваат метаболизмот и го намалуваат апетитот, а истите се нискокалорични.
Многу народи низ целиот свет веруваат дека јагодите имаат афродизијачки својства.
Јагоди и шампањ се синоним за романтични вечери за паровите. Имајќи го предвид нејзиниот срцев облик и силноцрвена боја, не треба да не чуди што е посветена на Венера, божицата на љубовта.
Јагодата зрачи – самиот поглед на неа е доволен да ни се врати насмевката на лицето.
За крај, обратете внимание на следново: при консумирањето на јагоди постои ризик истите да се третирани со штетни пестициди. Затоа најдобро е да купувате јагоди во кутија со декларација. Јагодите, исто така, се и алергени, па треба да ги одбегнуваат луѓе кои се осетливи на нив.
