Актерката Шенон Доерти, популарната Бренда од тинејџерската серија „Беверли Хилс 90210“, во 2015 се соочи со рак на дојката, со кој се бори во последните три години. За „Good Morning America“, во нејзиното прво интервју во живо, ја отвори душата и раскажа што се и донела болеста.
„Борбата со ракот ми помогна да бидам подобра актерка, но, исто така, мислам дека ме направи и подобро човечко битие. Болеста ги руши сите ѕидови, кои човек ги гради внатре во себе, како и сето она што животот го наметнал“, изјави актерката.
Шенон ја добила дијагнозата во 2015 година и тоа откако го тужела својот деловен менаџер дека не ги плаќал редовно премиите за нејзиното здравствено осигурување. Во тужбата истакнала дека поради тоа задоцнето ја добила потребната медицинска грижа.
Лекувањето на актерката вклучувало хемотерапија, зрачење и операција, а за сите процедури подели многу детали со своите фанови на Инстаграм.
„Споделувањето на моите искуства на социјалните мрежи ми помогна, бидејќи и други луѓе ми ги праќаа нивните приказни и тоа ми даваше надеж, поддршка и љубов. Сите тие луѓе ми станаа како семејство со кое го делев тоа тешко патување“, раскажува Шенон.
Популарната Бренда вели дека сега е добра со здравјето и опишува како се чувствувала кога слушнала дека е во ремисија.
„Кога ќе го слушнам зборот ремисија ме преплавуваат различни емоции, а најголемо прашање е „што следува после тоа“… Чувствувам страв, па изгубеност, потоа радост и возбудување, па ќе се сетам дека треба да чекам на резултатите од тумор-маркерите пет до десет години, и ако бидат негативни, дури тогаш можам да кажам дека сум излечена“, додава Доерти.
Шенон вели и дека е среќна што повторно работи, бидејќи и било важно да види дали може да го прави тоа. „Се вратив и видов дека можам и многу сум среќна“, вели популарната актерка.
