Најновите студии за новиот коронавирус, кои вчера ги презентираше Светската здравствена организација, покажуваат дека болните позитивни на SARS-CoV-2 се најзаразни за околината во моментот кога за прв пат ќе почнат да се чувствуваат лошо.
Според прелиминарните истражувања во Германија и во САД, пациентите со благи симптоми може да бидат заразни 9-8 дена, додека болните со потешки симптоми и многу подолго.
“И покрај органичените информации со кои располагаме во моментов, јасно е дека пациентите во себе имаат најмногу вирус, пред да им избијат симптоми или во моментот кога ќе почнат да ги развиваат. Поради ова, односно поради фактот дека луѓето се најзаразни пред и да им се појават првите симптоми, контролирањето на вирусот е многу тешко. Но, сепак ширењето може да се спречи со поригорозно тестирање на населението, како и со физичкото растојание“, објаснува Марија ван Керхов, епидемиолог во СЗО.
Според неа, некои лица може и воопшто да не развијат симптоми на КОВИД-19, но сепак да бидат заразни за околината и да го шират вирусот.
“Некои модели говорат дека околу 40 проценти од преносот на болеста, може да биде кај асимптоматските случаи, но тоа се модели на проценка“, потеницра Ван Керхов.
“Имаме патоген кој е присутен во горните дишни патишта во кои има најголема количина вирус токму во моментот кога почнувате лошо да се чувствувате. Новиот коронавирус се наоѓа во горните дишни патишта, што го прави многу полесен за пренос и ширење, во споредба со вирусите на САРС и на МЕРС, кои се наоѓаат во долните респираторни патишта“, вели Мајк Рајан, главен стручњак на СЗО за итни случаи.
