Секој петти маж и секоја шеста жена во светот заболуваат од рак во текот на животот, а секој осми маж и секоја единаесетта жена умираат од оваа болест, според светските податоци.
Ракот и понатаму алармантно се шири во светот со 18, 1 милиони нови случаи и 9,6 милиони смртни исходи во текот на оваа 2018 година, според последните податоци на Меѓународната агенција за истражување на ракот (ИАРЦ), при Светската здравствена организација (СЗО).
Ракот на бели дробови е најсмртоносен со 1,8 милиони смртни исходи или 18,4 отсто, потоа следува ракот на дебелото црево (881 000 смртни исходи или 9,2 отсто), рак на желудникот (783 000 смртни исходи) и рак на црниот дроб (782 000 смртни исходи), според новите процени за 36 видови рак во 185 земји. Без ракот на кожата, освен меланомот, новите случаи на рак достигаат 17 милиони во 2018 наспрема 14 милиони во 2012 година.
„Тие нови податоци покажуваат дека преостанува многу работа во одговорот на алармантното зголемување на светското бреме на ракот и дека превенцијата е клучна“, рекол Кристофер Вајлд, директор на ИАРЦ во Лион. „Итно мора да се преземат ефикасни пристапи во превенцијата и раното откривање на болеста во борбата против оваа разорувачка болест во светот“, додал во соопштението.
Околу половина од новите случаи и повеќе од половината смртни исходи од рак во светот во 2018 се забележани во Азија, повеќето во Кина, делумно и затоа што таму се сконцентрирани околу 60 отсто од светската популација. Во светот пет години после поставувањето на дијагнозата живеат 43,8 милиони лица, истакнуваат од специјализираната агенција. Ракот на бели дробови води меѓу најчесто дијагностицираните видови рак кај мажите и претставува главна причина за смрт од рак со околу 20 проценти од случаите. Посебно е загрижувачко зголемувањето на рак на бели дробови кај жените, кој сега претставува главна причина за смрт од рак меѓу жените во 28 земји.
