Толку пати повторениот совет на лекарите дека терапијата со антибиотици треба да се испие до крај, а не да се прекине после првите знаци на опоравување е погрешен, тврди група британски научници. На пациентите им се советува да не прекинуваат со земањето на овој вид лекови, веднаш штом симптомите ќе се ублажат затоа што тоа би можело да доведе до мутација на бактериите и до нивна отпорност на лекот.
Анализата објавена во „Британскиот медицински журнал“ не само што тврди дека за оваа теза нема докази, туку и смета дека продолженото земање антибиотици (подолго од три до пет дена) го зголемува ризикот да се создаде отпорност на лекот.
Без оглед на ваквиот заклучок, овие лекари наведуваат дека постојат болести како што е туберкулозата каде бактериите можат да станат отпорни доколку медикаментите не се земаат доволно долго. Но, додаваат, бројни бактерии (на пример, ешерихија коли или стафилококите) се наоѓаат на рацете на сите луѓе и не предизвикуваат никаква штета. Болест настанува само ако доспеат во крвотокот и органите за варење. Колку подолго во тој случај се изложени на делување на антибиотици, толку е поголема веројатноста да се развие отпорност, нагласуваат овие лекари.
Според нивното мислење, немало доволно истражувања за тоа колку идеално би требало да трае лекувањето со антибиотици. Во болниците пациентите можат да се подложат на тестови да се види кога треба да се престане со лековите, но во домашни услови таквите проверки не се изводливи и заради тоа на пациентите треба да им се каже да го прекинат третманот веднаш штом ќе почнат да се чувствуваат подобро. Таквиот совет е сосема спротивен со препораката на Светската здравствена организација и, како што сметаат од Британскиот кралски колеџ, може да предизвика забуна кај луѓето.
Ова професионално здружение советува дека пациентите би требало да постапуваат според упатството на своите лекари затоа што една студија не е доволна нејзините наоди веднаш да се уважат. Подобрувањето на состојбата не значи дека инфекцијата е потполно искоренета, потсетуваат лекарите, а пренесува „Гардијан“.
Намалувањето на употребата на антибиотиците е клучно во борбата против растечката отпорност на овој вид лекови.
