Неодамнешните истражувања потврдуваат дека со консумација на кората од овошје и зеленчук може да го снабдите својот организам со здрави антиоксиданти, да го подобрите варењето, да го подигнете нивото на енергија, но и да се заштитите од разни облици на рак.
Освен кората, не треба да ги фрлате ниту стеблата и централниот дел од овошјето и зеленчукот, бидејќи и во нив се кријат моќни хранливи материи кои се од суштинско значење за вашиот организам.
Банана
Кората на ова омилено овошје секогаш се фрла. Но дали знаете дека кората на бананата содржи многу серотонин, што значи дека може да го поправи вашето расположение и да ја намали депресијата?
Обвивката на бананата го штити и здравјето на вашите очи и може да спречи катаракта, благодарение на лутеинот кој го содржи. Лутеинот, имено, ги штити очите од штетните ефекти на ултравиолетовата светлина.
Совет за консумирање: Кората од бананата ставете ја во блендер заедно со самата банана или проварете ја во вода десетина минути, па испијте ја кога ќе се олади.
Јаболко
Дали знаевте дека кората од јаболко содржи речиси половина од количината на диететски влакна содржани во цело јаболко?
Со лупење на кората губите една третина од здравите хранливи материи, како што се витамин Ц, витамин А и калиум. Самата кора, исто така, содржи четири пати повеќе витамин К од самиот плод. Во јаболковата кора се наоѓа и кверцетин – моќен антиоксидант, кој го чува здравјето на белите дробови и ја подобрува функцијата на мозокот. Се разбира, сето ова се однесува на органско јаболко.
Ананас
Кога станува збор за ова егзотично овошје, не не интересира боцкавата тврда кора, туку сржта – средишниот дел од ананасот што обично го фрламе.
Покрај изобилството на витамин Ц и влакна, сржта содржи и бромелин – дигестивен ензим, кој има силни антиинфламаторни својства и ја засилува биоискористливоста на хранливите материи.
Средишниот дел на ананасот содржи дури три пати повеќе бромелин отколку самиот плод.
Совет за консумација: Средишниот дел на ананасот изблендирајте го.
Цитрусни плодови
Ви паднало ли некогаш на памет да ја изедете, на пример, кората од портокал или мандарина?
Но токму таа кора содржи многу флавоноиди, кои значително можат да ги намалат нивото на лошиот холестерол без да влијаат на нивото на добриот холестерол.
Антиоксидантите во кората на мандарината и портокалот се дури 20 пати посилни од антиоксидантите од нивната пулпа!
Белата мембрана која се наоѓа на кората на цитрусното овошје содржи пектин, кој помага во варењето и го стимулира формирањето на добри бактерии во цревата.
Совет за консумација: Изренданата кора од (еколошки) цитруси додадете ја во вашите омилени слатки и колачи. Исто така, можете и да ставите цел лимон, портокал или мандарина во соковник.
Компири
Ако изедете само еден компир со големина на тупаница, ќе го снабдите организмот со половина од дневно препорачана количина на витамин Ц, калиум, фосфор, цинк, железо и растворливи влакна!
Совет за консумирање: Варете ги и печете ги компирите со кора. Претходно добро измијте ги.
Брокула
Кога подготвувате брокула, обично ги оставате само цветовите, а средината, тврдиот дел, го фрлате? Но токму тој дел од брокулите содржи повеќе витамин Ц и калциум отколку самите цветови.
Освен тоа, ако го јадете стеблото на брокулите, ќе имате подолго чувство на ситост со оглед на растворливите влакна што ги содржи тој дел.
Лук
Според една студија спроведена во Јапонија, лушпата на лукот содржи шест одделни антиоксидантни супстанции. Се работи за т.н. фенилпропаноиди, кои го штитат срцето и го забавуваат процесот на стареење.
Совет за консумација: Отсега во подготовката на вашите јадења едноставно додадете цели неизлупени чешниња лук, без разлика дали се работи за варен зеленчук или зеленчук печен во рерна.
