Над 67.000 заболени и приближно 2.000 починати е моменталната црна статистика на коронавирусот во земјава. Но, на неа се придружуваат и бројките на оние кои оздравеле и кои ги има над 42.000. Како овие лица, по опоравувањето треба да се однесуваат и дали за нив важат други правила? Стручњаците одговараат да-не!
Лицата кои се опоравиле од КОВИД-19 треба и понатаму да се придржуваат до сите мерки кои се се препорачани на лицата кои не заболеле од КОВИД-19. Тоа е поради тоа што не се знае траењето на имунитетот по оздравувањето и затоа што не се знае дали лицето кое е имуно, може да биде асимптоматски носител на вирусот и да го пренесува на контакти.
Експертите објаснуваат дека и сознанијата за траењето на имунитетот по опоравување од болеста КОВИД-19, се уште се недостапни.
Начелно се смета дека лицата по оздравувањето, би требало да бидат имуни во наредните два до три месеци. Меѓутоа, не може да се исклучи дека поединци немаат заштита по закрепнувањето, како што не може да се исклучи ниту имунитетот со подолго времетраење.
Лекарите предупредуваат дека нема опуштање за никого, па така ниту за лицата кои имаат антитела. Наодот за антитела со комерцијален тест, не гарантира имунитет, а позитивниот серолошки тест не е никаква замена за негативен ПЦР тест.
Вакцината секаде во светот со нетрпение се очекува, а до појавата на некои нови информации и истражувања се чини дека е пожелно да се вакцинираат и оние кои го прележале КОВИД-19.
“Се уште нема доволно податоци за да со сигурност можеме да кажеме дали е потребна вакцинација на лицата кои се опоравиле од КОВИД-19 и во колкава мерка се постигнува дополнителниот заштитен ефект од имунизацијата кај лицата кои се опоравиле од коронавирусот. Во недостиг на податоци, засега препорака е да се вакцинираат и лицата кои го поминале коронавирусот“, велат епидемиолозите.
Без оглед дали сте го прележале коронавирусот или не, истите правила важат за сите – носење маска, дезинфекција, социјална дистанца. Ако сте во групата на оние кои штотуку се опоравуле од КОВИД-19, секако треба да ги следите упатствата од вашиот лекар, а ова се куси совети како да си го олесните периодот на опоравување.
- Не прескокнувајте физичка активност
- Внимавајте на исхраната
- Вежбајте го мозокот
- Внимавајте на предупредувачките сигнали
- Дозволете да ви се помогне
