Некои здравствени стручњаци велат дека е добра вест што првите лица, за кои се знае дека се заразени со омикрон, имале благи симптоми на КОВИД-19, иако предупредија дека се уште е рано да се извлечат цврсти заклучоци за најновата варијанта на коронавирусот која Светската здравствена организација ја категоризира како загрижувачка.
“Дури и ако тежината на болеста е еднаква или потенцијално дури и поблага отколку при делта варијантата, се очекува дека ќе се зголеми бројот на хоспитализации доколку се заразат повеќе луѓе и дека ќе постои временски интервал помеѓу зголемувањето на инциденцата на случаеви на болеста и зголемување на инциденцата на смртност“, се наведува во неделниот извештај на СЗО, објавен вчера.
Во извештајот пак, што во текот на минатиот викенд го издаде Јужноафриканскиот совет за медицински истражувања се наведува дека поголемиот број на пациенти во болница во Преторија, за кои се верува дека се заразени со омикрон, не се хоспитализрани поради КОВИД-19, туку од друга медицинска причина. Од 42 пациенти, околу 70 проценти од нив немаат проблеми со дишењето и не им е потребен кислород.
“Ова е слика која не е видена во претходните бранови“, се наведува во извештајот. Дури и на почетокот на претходните бранови, повеќето хоспитализирани пациенти со КОВИД-19 имаа проблеми со дишењето. Сепак, потребно е повеќе време за во целост да се одговори на прашањата за тежината на КОВИД-19 предизвикан од новата варијанта омикрон“.
“Многу е рано, а популацијата на пациенти е млада, но охрабрувачките првични податоци укажуваат на помала (потреба за кислород за пациентите) и помала тежина (на симптомите)“, вели главниот калифорниски епидемиолог, д-р Ерика Пан.
Д-р Ентони Фаучи, главен американски советник за пандемијата, го нарече извештајот за Јужна Африка “охрабрувачки“, но додава дека “навистина мораме да бидеме внимателни пред да донесеме било каков заклучок дека болеста е помалку сериозна, или навистина не предизвикува тешка болест во споредба со делта“.
Новата варијанта, потенцира д-р Фаучи очигледно е многу заразана, многу веројатно повеќе од делта, која што моментално е доминантна варијанта.
Но, и тој нагласува дека популацијата заразена со омикрон е млада и затоа е и помала веројатноста за хоспитализации. За развој на тешка болест некогаш се потребни недели, додава д-р Фаучи.
“Се уште е рано да се каже дали омикрон ќе резултира со поблаги симптоми на КОВИД-19. Дури и ако се работи за лесна форма на болеста, важно е и понатаму брзо да делуваме за да преземеме мерки за контрола на нејзиното ширење. Бидејќи, дури и ако имаме голем број на случаи кои се лесни, на некои од тие лица ќе им биде потребно згрижување во болница, интензивна нега, а некои и ќе завршат фатално“, вели Марија Ван Керхов, епидемиолог на СЗО.
Едно од најголемите прашања за стручњаците во САД е што ќе се случи кога омикрон ќе и се “спротивстави“ на делта варијантата која моментално чини 99,9 проценти од анализраните примероци на коронавирусот во САД. Нејасно е дали делта ќе остане доминантен вид или омикрон ќе може го истисне.
“Она што се уште не го знаеме е колку ќе се пренесува, колку добро ќе делуваат вакцините, дали ќе доведе до потешка болест“, вели д-р Рошел Валенски, директорка на Центарот за контрола и превенција на болести на САД.
Останува загриженоста околу тоа колку омикрон варијантата е заразна.
Тревор Бедфорд, истражувач на заразни болести кој го проучува ширењето на коронавирусот, вели дека стапката на преносливост на омикрон би можела да ја направи оваа варијанта “многу поголема закана во смисол на бројот на случаи отколку делта“.
“Големината на овој бран во голема мера ќе зависи од популацијата подложна на инфекцијата. Иако моменталните податоци не можат во целост да одговорат на тоа колку омикрон може да им ‘избега’ на вакцините, мислам дека и во не така мала мера, може. И некои лица кои ја прележале делта ќе бидат подложни на инфекција со омикрон“, објаснува д-р Бедфорд.
