Во најновите информации за варијантите на КОВИД, британската Агенција за здравствена безбедност (UKHSA) наведува дека во неделата од 14 август, подваријантата BA.4.6 чини 3,3 проценти од сите позитивни тестови во Велика Британија. До денес, таа се проширила на дури 9 проценти од секвенционираните примероци.
Исто така, податоците од Центарот за контрола и превенција на болести на САД (ЦДЦ) покажуваат дека оваа подваријанта сега опфаќа над 9 проценти од сите неодамнешни случаи на коронавирус во САД. Варијантата е идентификувана и во неколку други земји низ светот.
ШТО СЕ ЗНАЕ ЗА ВА.4.6 И ТРЕБА ЛИ ДА БИДЕМЕ ЗАГРИЖЕНИ?
BA.4.6 е „потомок“ на варијантата BA.4 на омикрон. Варијантата BA.4 за прв пат беше откриена во јануари оваа година во Јужноафриканската Република, од каде што заедно со варијантата BA.5 се прошири низ светот.
Не е сосема јасно како се појавила подваријантата BA.4.6, но можно е да се работи за таканаречена рекомбинантна варијанта. Рекомбинацијата се јавува кога две различни варијанти на вирусот SARS-CoV-2 заразуваат едно лице во исто време.
И додека BA.4.6 е слична на варијантата BA.4 на многу начини, таа сепак носи мутација на шилестиот протеи на површината на вирусот, што му овозможува да навлезе во човечките клетки.
Таа мутација, R346T, е забележана во некои други варијанти и е поврзана со избегнување на имунолошкиот одговор, што значи дека на вирусите со таа мутација им е полесно да ги избегнат антителата настанати со вакцинација или претходна инфекција.
ТЕЖИНА, ЗАРАЗНОСТ И ИЗБЕГНУВАЊЕ НА ИМУНОЛОШКИОТ ОДГОВОР
За среќа, инфекциите со варијанти на омикрон генерално резултираат со помалку тешка болест. Варијантата омикрон е помалку смртоносна во споредба со претходните варијанти на коронавирусот. Може да очекуваме истото да важи и за ВА.4.6. Засега нема извештаи дека оваа варијанта предизвикува посериозни симптоми.
Сепак, знаеме и дека подваријантите на омикрон се позаразни од претходните. Се чини дека BA.4.6 е уште поуспешен во избегнувањето на имунолошкиот систем од BA.5, моментално доминантната варијанта. Иако овие информации се засноваат на студии кои допрва треба да бидат подложени на рецензија, останатите податоци ја поддржуваат оваа теорија.
Според информациите на UKHSA, раните проценки сугерираат дека BA.4.6 се шири побрзо во раните фази на инфекцијата отколку варијантата BA.5.
Сепак, оваа брзина е дефинитивно помала од онаа на варијантата BA.5 во споредба со варијантата BA.2.
Универзитетот во Оксфорд известува дека оние кои примиле три дози од оригиналната Фајзер вакцина создале помалку антитела како одговор на варијантата BA.4.6 во споредба со BA.4 или BA.5, што е загрижувачко бидејќи сугерира дека вакцините против Ковид може да бидат помалку ефикасни во борба против ВА.4.6.
Способноста на оваа подваријанта да го избегне имунолошкиот одговор би можела да биде донекаде намалена со новите бивалентни бустер вакцини кои ги напаѓаат конкретно омикрон подваријантите, покрај оригиналната верзија на вирусот SARS-Cov-2. Ќе стане појасно со текот на времето.
