Гастритисот претставува воспаление на внатрешниот слој на желудникот (слузокожата) и може да биде од акутна и хронична природа. Причина за гастритисот можат да бидат иритантни дејства како консумирање алкохол или користење нестероидни, антиинфламаторни лекови, на пример. Стресот има значително влијание на појавата на акутен гастритис затоа што го зголемува лачењето на желудочна киселина.
Причина за хроничниот гастритис можат да бидат инфекции со бактеријата хеликобактер пилори, повраќање, хроничен рефлукс на жолчка од дванаестпалечното црево, но се јавува и кај заболените од ХИВ, Кронова болест и некои автоимуни болести. Во некои случаи нелекуваниот гастритис може да доведе до појава на улкус и малигни промени во желудникот.
Како се манифестира акутниот гастритис
Многу личности со гастритис немаат никакви симптоми, но доколку постојат најчестите се:
- Болка во горниот лев дел на стомакот кој може да биде тап, но и остар и прободувачки;
- Болката може да се шири и кон грбот;
- Мачнина, гадење и повраќање (кое носи краткотрајно подобрување);
- Подригнување;
- Непријатен вкус во устата;
- Надуеност;
- Чувство на ситост после само неколку залчиња храна;
- Одвратност кон храната;
- Губиток на апетитот;
- Необјасниво губење на тежната;
- Заради ерозиите на слузокожата на желудникот кои можат да крвават, може да се појави црна столица (мелена), а мошне ретко и повраќање на крв (хематемеза) што е почесто кај чир на желудникот.
Како се поставува дијагноза
Дијагнозата може да постави врз основа на анамнеза и клиничка слика, но дефинитивно се потврдува со гастроскопија, која патем овозможува и земање на ткиво за хистопатолошки и микробиолошки преглед, кој доста помага во терапијата. Ултразвукот на стомакот не е доволен за поставување на дијагнозата, но може да помогне во исклучување на некои други заболувања.
Лабораториските анализи не се специфични и можат да покажат постоење на анемија (во случај на крвавење), зголемување на седиментација, ЦРП и промена на леукоцитните формули. Не постои специфичен наод кој дефинитивно ја потврдува дијагнозата на акутен гатсритис.
ЛЕКУВАЊЕ:
Лекувањето зависи од причинителот. Така, ако причината е инфекција, се подразбира адекватна антибиотска терапија. Во случај причината да е консумирање алкохол или прекумерна употреба на лекови до намалување на тегобите доаѓа после елиминирање на овие фактори. Мошне е важно да се намали киселоста на желудочниот сок и тоа со помош на два вида лекови – блокатори на Х2 рецепторите и инхибитори на протонската пумпа. За лекување и за ублажување на симптомите може да се користат и лековите кои го врзуваат вишокот желудочна киселина. Хеликобактер пилори се лекува со антибиотици, и тоа нивна комбинација, а во лекувањето на акутниот гатсритис исклучително важен е и хигиено-диететскиот режим на исхрана, што подразбира помали и почести оброци, одбегнување масна и зачинета храна, алкохол и лекови против болки. Потребно е да се направи и контролна гастроскопија за да се исконтролира лекувањето и излекувањето на воспалителниот процес.
