Бакерова циста е циста исполнета со течности, поради која доаѓа до отекување на коленото. Болките може да се влошат кога ќе ја превикате ногата или при движење. Цистата обично се јавува како последица на кршење на ‘рскавица или артритис. Се создава како проширување на бурзите при што доаѓа до воспалителна реакција. Најчесто се наоѓа зад коленото и доведува до негово отежнато движење.
Проблеми со коленото
Еден од најчестите симптоми кај лицата кои имаат проблеми со колената е вода во коленото, до која може да дојде поради крвен оток по траума, при што пука еден или неколку крвни садови, како и поради зголемено лачење на течност во зглобот. Водата во колено најчесно се препознава по болки во коленото, негова крутост и отоци.
Главната причина за цистата е синовијална течност која циркулира во бурзите, помага да се намали триењето и овозможува непречено движење на коленото. Ако во коленото се формира голема количина синовијална течност, таа се акумулира во просторот зад коленото што резултира со циста.
Најчести причини се:
Траума или повреда на коленото – што резултира со шинување или надворешни повреди. Симптомите може да бидат вкочанетост, нестабилност во зглобовите и болки.
Ревматоиден артритис – хронично заболуање на сврзното ткиво кое најчесто се јавува на мускулите, зглобовите.
Псоријаза – хронична болест на кожата со суви промени на неа. Може да предизвика забрзан развој на клетките на кожата, како и задебелување со симптоми како сувост и чешање. Тоа е долготрајна болест чии симптоми се појавуваат периодично. Не е заразна.
Реактивен артритис – хроничен вид на артритис кој може да предизвика воспаление на дигестивниот или уринарниот тракт, како и на очите и зглобовите.
Хемофилија – болест каде што крвта не се згрутчува правилно. Може е да се препознае по крварење од носот без позната причина, длабоки и големи модрици, стегање во зглобовите, како и крв во урината или столицата.
Лупус – автоимуна болест кога имуниот систем го напаѓа здравото ткиво. Најчести знаци се губење на помнењето главоболка, Reynaud синдром, суви очи и болки во прстите.
Гихт – зголеменото ниво на мочната киселина доведува до насобирање на кристали на зглобовите. Може да се препознае по отечени зглобови, силна болка, чувство на топлина и црвенило.
Септичен артритис – воспаление на зглобовите предизвикано од бактериска инфекција. Симптоми се болки во зглобовите,а причинители најчесто се бактериите како Staphylococcus aureus, кои навлегуваат во зглобовите каде што предизвикуваат низа оштетувања.
Остеоартритис – вид на артритис предизвикан од воспаление во зглобовите. Тоа е најчеста форма на артритис до кој доаѓа откако заштитната ‘раскавица ќе се потроши.
Ако забележите оток на коленото или ако почувствувате болка, јавете се кај лекар, бидејќи понекогаш цистата може да биде резултат на тумор или анеуризма.
