Денес е “Виолетов ден“, односно ден за поддршка за лицата со епилепсија. 26. март се одбележува секоја година, во над 100 земји во светот и е именуван за еден од највлијателните меѓународни денови за подигање на свеста за оваа болест. Денот, почнал да се одбележува пред 11 години, во 2008 година по иницијатива на Касиди Меган, девојче кое боледува од епилепсија и кое заедно со Здружението за епилепсија од Канада сакала да му покаже на светот дека лицата со оваа болест не се разликуваат од останатите луѓе.
Епилепсијата е една од најчестите болести, односно пореметувања во неврологијата, која претставува повремено и најчесто краткотрајно пореметување на функцијата на кората на мозокот.
Оваа изразено тешка и широко распространета болест вклучува било која состојба при која постои повторување на епизоди на напади, во текот на кои може да дојде до делумно или целосно губење на свеста, невообичаени движења на вилицата, вкочанетост и пореметување на говорот, грчење на мускулите, како и губење на осетот, автоимуните функции, расположение и ментални функции.
Денес во светот од епилепсија боледуваат над 50 милиони лица.
Кај здрави лица, нервните клетки во мозокот меѓусебно комуницираат со испраќање на ситни електрични сигнали. Кај лицата со епилепсија, сигналите од една група нервни клетки повремено стануваат пресилни. До ова пореметување доаѓа изненадно. Нападот се карактеризира на разни начини, зависно од положбата и големината на погоденото подрачје на мозокот.
Не е позната причината поради која комуникацискиот систем на мозокот кај одредени лица затајува. Кај околу две третини од лицата со епилепсија нема откриено структурен недостаток во мозокот. Останата третина, сепак имаат некаков вид на претходни повреди. Причината за епилепсија во возрасниот период, неретко е тумор на мозокот.
ВИДОВИ ЕПИЛЕПСИЈА
Според меѓународната класификација, дефинирани се околу 30. видови епилепсија, при што секоја од нив се одликува со карактеристични симптоми. Меѓутоа, епилептичните напади, општо збрувајќи, може да се поделат во 3 групи.
- Генерализирани напади – со целосно пореметување на свеста
- Парцијални напади – со делумно пореметување на свеста
- Специјални епилептични синдроми
