Хименот претставува кожна дупликатура која се наоѓа на самиот влез во вагината и ја дели вулвата од интроитусот (влезот) во вагината. Инперфорираниот химен претставува најекстремна аномалија на оваа структура, која се карактеризира со присутво на мембранозна структура без отвор во пределот на хименот. Нешто почесто се среќаваат и други малформации како микроотвор во вид на сито, преграда, траја, поместеност на хименост нанапред. Во прашање е конгенитална (вродена мана) која се среќава при раѓањето на детето. Точната причина за настанувањето е во потполност непозната, но се претпоставува дека постои генетска предиспозиција. Статистичките податоци се различни и се движат од еден случај на 100, па до еден случај на 10 000 новородени женски деца. Во најголем број случаи оваа состојба се јавува спорадично, но постои и одреден број семејни појавувања.
Како се манифестира инперфорираниот химен?
- Како што е веќе споменато, постои тенка, мембранозна опна без отвор на влезот во вагината;
- Бидејќи не постои поминување на секретот и евентуално менструална крв доаѓа до насобирање во пределот на матката, па може да се јави мукоколпос (секрет во вагината), хематоколпос (крв во вагината), мукометра (секрет во матката), хематометра (крв во матката) кои можат толку да нараснат што може да се напипаат преку предниот стомачен ѕид;
- Хименот може да биде обоен жолтеникаво или синкаство во зависност од природата на секретот кој се наоѓа зад него;
- Мошне сериозна компликација на големите стомачни маси е опструкцијата на протокот на урина и појава на хидронефроза;
- Можна е појава и на секундарни инфекции, доколку дојде до внес на бактерии во насобраната маса на слуз и крв;
- Сите симптоми и клинички знаци најчесто се јавуваат во периодот на првата менструација.
Како се поставува дијагнозата на инперфориран химен?
Дијагнозата во најголем број случаи се поставува веќе кај новороденчињата, непосредно по раѓањето. Со обичен преглед може да се востанови дека не постои отвор во пределот на хименот. Со ултразвучен преглед на стомакот, пак, може да се визуализира колекција која настанала со насобирање на секрети или крв. Никогаш не би требало да се врши дренажа на насобраната течност со игла заради големата опасност од секундарни бактериски инфекции.
Лекување
Лекувањето опфаќа оперативен пристап кој подразбира креирање на отвор на хименот.
