Оваа состојба претставува многу силен менструален циклус. Многу жени сметаат дека имаат посилен циклус, но всушност при менорагијата станува збор за навистина значително голема загуба на крв. Ако при нормален циклус жената губи околу 30-40 мл крв во рамките на пет до осум дена, при ова заболување зборуваме за 80 мл и повеќе, а циклусот може да продолжи и до 10 дена.
При менорагијата влошката се полни со крв на секои еден до два часа, често жената има потреба да користи двојна заштита (влошка и тампон) и во текот на ноќта станува да ја смени заштитата неколку пати. Поголемото губење крв доведува до замор, снеможеност, задишаност и силни стомачни болки.
Причините за менорагијата може да бидат различни. Кај некои жени тоа е резултат на хормонален дисбаланс, кога има промени во нивото на естроген и прогестерон. Кај други тоа се јавува поради проблем со јајчниците. Понекогаш менорагијата е несакан ефект на цисти, полипи, миом, бубрежни заболувања или, пак, доаѓа по спонтан абортус или пиење појаки антибиотици.
Менорагијата е исклучително непријатна состојба за жената бидејќи секој месец и се нарушува секојдневниот режим на живот и бара повеќе одмор. Губењето на крв води до појава на анемија, низок хемоглобин, промени во крвната слика, низок крвен притисок. Некогаш, пак, е сигнал за посериозно гинеколошко заболување, па поради тоа задолжително треба да направите консултација со вашиот матичен гинеколог доколку во продолжение од два-три месеци забележите дека имате посилен менструален циклус.
Во зависнот од причините кои довеле до појава на менорагија и лекувањето е различно. Полесните форми не изискуваат интервенција или, пак, се лекуваат со аналгетици и хормонални апчиња. Често се препишува контрацепција за да се регулира циклусот. Кога постојат сомневања за посериозен проблем, се прават крвни испитувања, вагинален преглед и ехо преглед за да се утврди која е причината што ја предизвикала менорагијата. Само во најтешките случаи има потреба од хируршка интервенција.
