Нема девојка која кога била малечка не посакала да биде како Пепелашка. Е па, сега постои посебна „диета“ со идеја да се постигнат мерките и изгледот на Пепелашка. Да, онаа Пепелашка од Дизниевиот анимиран филм, да се постигнат нејзините мерки и изглед. Па треба ли воопшто да се каже колку сето ова е нереално и апсолутно лудо?!
„Пепелашка диетата“ е создадена во Јапонија и за кусо време станала хит на Твитер. Целта на оваа диета е да се достигне тежината на Пепелашка, која наводно се пресметува без оглед на висината. Бројките на таканаречената идеална тежина на Пепелашка се потполно луди и дебело под границите на здравата телесна тежина за една возрасна жена.
Така, според оваа „диета“ идеалната тежина на девојка која е висока 1, 60 м – 46 килограми, девојка со висина од 1,70 м би требала да тежи 52 килограми, додека на висина од 1,80 м бројот на килограмите би требало да биде 58.
Не е баш за верување дека жените навистина мислат оти ова е „идеал“. Исто така, испраќа и потполно погрешна порака на светот – дека сме подобри ако сме послаби.
Како што една нутриционистка напишала на Твитер: „Ова не е диета, туку потполно нереалистична цел за телесна тежина која може само да му наштети на организмот! Да се биде недохранет е еднакво лошо како и да се биде дебел.“
За среќа, денешните Дизни принцези доаѓаат во сите величини, облици, бои на кожа и коса, па повеќе ја истакнуваат вистинската вредност на убавината, храброста, упорноста, одлучноста и независноста.
