Повеќето од нас не можат да си го замислат денот без мобилен или компјутер. А познато е и дека технологијата со себе носи и низа ризици по здравјето, односно може да резултира со симптоми како што се – умор, болки во очите и главоболка. Можеби патите поради напрегање од синото светло кое доаѓа од екраните на нашите уреди, а особено од компјутерите кои за повеќето од нас станаа основна алатка за работа. Намалувањето на времето поминато пред компјутер ќе помогне – дефинитивно, но во зависност од професијата и невозможно е да се одбегнат овие апарати во целост. Што може да се стори? Збогатете ја исхраната, па заштитете ги мозокот и видот.
Што е сино светло и зошто е лошо?
Кога гледаме во сончева светлина или „бело светло“ всушност гледаме во комбинација на различно обоени зраци светлина. Силното сино светло кое доаѓа од телевизорите, компјутерите, таблетите и мобилните телефони може да биде исклучително штетно за очите и мозокот. Нашите очи можат да блокираат други УВ зраци, но видливата сина светлина може да помине низ мрежницата на окото.
Како резултат на тоа постепено доаѓа до главоболки, болки во очите, потешкотии во фокусирањето, лош квалитет на сонот.
Со храна против екраните
Нема подобро решение од тоа да седите подалеку од екраните или да носите заштитни очила, но добро е да се знае дека во „борбата“ можат да помогнат и одредени нутритиенти кои ги ублажуваат последиците од сината светлина. Храната која содржи зеаксантин, лиутеин и астаксантин ги штити очите, а поврзана е и со спречување главоболки и замор. Добар извор на овие нутритиенти е зелениот зеленчук, а со зеаксантин особено изобилува зеленчукот како што се брокулите, спанаќот и ќељот. Лутеинот се наоѓа во портокалите, морковите, пиперката и тиквата. Астаксантинот т.е. корисниот црвен пигмент доаѓа во облик на морска храна како што се лососот и шкампите. Овие намирници можете да ги комбинирате или да направите смути, па да го испиете за појадок.
