Синдромот на токсичен шок е ретка, по животот опасна компликација на бактериска инфекција. Често е поврзана со користење тампони и контрацептивни сунѓери. Шок синдромот е резултат на токсинот кој го произведуваат Staphylococcus (staph) aerius бактериите, но, исто така, може да биде предизвикан и од токсините кои ги произведува групата А Streptococcus (strep) бактерии. Болеста може да ја предизвика и Streptococcus pyogenes кој произведува два различни ендотоксини. Иако синдромот најчесто се појавува за време на менструација кај жените, може да ги зафати и мажите, децата и жените во постменопауза. Ризичните фактори за шок синдромот вклучуваат и повреди на кожата или операции. Знаците и симптомите на синдромот на шок се појавуваат одеднаш, а болеста може да биде фатална. Сепак, може да се преземат некои чекори за да се намали ризикот од синдромот на токсичен шок.
СИМПТОМИ
Почнува нагло, иако инфекцијата бавно напредува. Но штом еднаш почнат да се размножуваат бактериите, тие предизвикуваат ненадејни симптоми, а тие се:
- Ненадејна висока температура;
- Низок крвен притисок;
- Повраќање или пролив;
- Осип налик на изгореница, особено на дланките и табаните;
- Збунетост;
- Болка во мускулите;
- Црвенило во очите, устата или грлото;
- Напади;
- Главоболка;
- Оштетување на црниот дроб;
- Оштетување на бубрезите.
Полесните случаи се почести и вклучуваат благи симптоми и брзо оздравување. Шокот на токсичен синдром кој не се лекува може да доведе до потешки последици како што се затајување на органите и конечно смрт.
КОГА ДА СЕ ПОЈДЕ НА ЛЕКАР?
Ако имате какви било знаци или симптоми, веднаш побарајте лекарска помош. Тоа е особено важно ако имате менструација или неодамна ви завршила. Исто важи и за тоа ако користите тампони или ако имате инфекција на кожата или рана.
ПРИЧИНИ ЗА ПОЈАВА:
Може да му се случи секому и е синдром поврзан со:
- Користење тампони;
- Носење дијафрагма или контрацепциски сунѓер;
- Инфекции на рани или какви било кожни повреди.
Од синдромот на токсичен шок најпрво ќе заболат жените кои веќе имаат стафилокока во матката и оние кои неодамна биле бремени и родиле по вагинален пат. Но можат да заболат и мажите, повозрасните и децата – ризикот после некоја операција е поголем.
КОРИСТЕЊЕ ТАМПОНИ
Истражувачите не знаат точно како тампоните предизвикуваат синдром на токсичен шок, но заради нив настанува кога тампонот се остава подолго време (повеќе од осум часа) без да се смени, при тоа станувајќи плодна подлога за бактерии. Други сметаат дека влакната во тампоните можат да ја изгребат површината на вагината, што им овозможува на бактериите да навлезат во крвотокот и да предизвикаат ендотоксичен шок.
ЛЕКУВАЊЕ
Причината за инфекцијата се дијагностицира со брисеви на бактерии, а тие се земаат од подрачјето на носот, устата и матката. Исто така, се прават и крвни анализи, како и контрола на функцијата на бубрезите, црниот дроб и белите дробови. Синдромот на токсичен шок се третира во болнички услови и со антибиотици. Ако дојде до паѓање на крвниот притисок, ќе бидат потребни и лекови за нивно стабилизирање, како и течности за лекување на дехидратацијата. Ретко кога завршува со смрт или потешки последици, а може да се излекува во целост ако на време се почне со примена на антибиотици.
