Колку пати сте биле на лекар поради тегоби во долниот дел на стомакот, во областа на мочниот меур? Најчесто се јавува како чувство на печење при мокрење, болка за време на и по мокрење, отежнато мокрење, честа потреба да се оди во тоалет, но и како болка во карлицата и долниот дел на грбот. Сите овие симптоми значат воспаление на мочниот меур или некој друг дел на уринарниот тракт, а за да се утврди причината на болеста, а со тоа и видот на лекот, потребно е да се направи уринокултура.
Што е уринокултура? Микробиолошко испитување со кое се утврдува дали постојат бактерии во вашата урина, поради кои имате проблеми со мокрењето и болки. Таа ќе му ги обезбеди сите потребни информации на лекарот за вашата болест, и со нејзина помош тој ќе знае што понатаму треба да прави
Урината на здрав човек е стерилна и во неа нема микроорганизми, додека кај луѓето со воспаление на уринарниот тракт бактериите се присутни и врз основа на уринокултурата може да се докаже нивниот вид и сериозност на инфекцијата.
Уринокултура се прави по упат од матичниот лекар и тоа во ситуации кога болката во долниот дел покрај пецкањето е придружена и со покачена телесна температура. На ова испитување покрај матичен лекар може да ве упати и уролог или специјалист од друг оддел.
Ако се работи за едноставно воспаление, важно е само да се утврди дали има бактерии и колку, а ако станува збор за хронично воспаление на мочниот меур, многу е важно да се определи за кои бактерии се работи, поради соодветно препишување на лек, односно вистински избор на антибиотик.
Земање примерок кај возрасни
Не бара посебни подготовки. Можете да јадете и да пиете што сакате, а важно е само да му напоменете на лекарот дали сте пиеле антибиотици во последните недели. Најважниот дел од подготовката е да се остави урината доволно долго во мочниот меур за да може во неа да се развијат бактерии. Поради ова, урината што ја даваме на тестирање мора да биде концентрирана, односно да стои во мочниот меур најмалку 4 часа.
Поради оваа причина, се препорачува да се земе првата утринска урина, односно нејзиниот среден млаз и да се даде на анализа. Ако не дадете урина за анализа наутро, внимавајте да не одите во тоалет најмалку четири часа пред да дадете урина за анализа. Урината се носи во стерилен пластичен сад кој се купува во аптеките.
