Децата имаат најмалку два периода на забрзан раст, од четвртата до седмата година и при крајот на пубертетот. Кај некои деца постои уште еден период помеѓу двата гореспоменати, но тоа е многу индивидуално. Децата понекогаш растат во сон и тоа знае да биде болно.
Се жалат на болки од растењето во колената или во потколениците, навечер или во текот на ноќта. Болките не се проследени со други симптоми (зголемена телесна температура, ограничена подвижност на зглобовите, отоци…), а кога болката ќе помине дете се однесува вообичаено, како ништо да не се случило.
Тоа се случува кога коските растат и им „зборуваат“ на мускулите дека и тие мораат да се издложат. Доколку мускулот преспоро реагира, процесот може да биде болен.
Ако болката трае подолго од две недели без престан, родителите, советуваат ортопедите, мораат да се обратат за стручна лекарска помош. Истото важи и ако болката не престанува и во текот на денот или ако се појават отоци или црвенкасти дамки. Тоа може да бидат симптоми на скршеница или детски артритис.
Болките за време на растот неретко се препишуваат на пребрзото растење и растегнување на фасцијата и лигаментите и неможноста мускулите да го следат наглото растење на коските.
Ортопедите им советуваат на родителите пред да заклучат дека нивното дете „боледува од растење“, да се консултираат со лекар кој ќе земе анамнеза, а по потреба ќе примени и други дијагностички методи. Целта е да се исклучат сите останати потенцијални причинители.
Децата кои чувствуваат болки при растењето може да се занимаваат со сите физички активности, доколку тие не влијаат на зголемување на болката.
