Секој од стомачните органи може, помалку или повеќе, да се спушти од своето место, но тоа најчесто се случува со желудникот. Како најголем стомачен орган, кој наизменично го менува обемот и кој во стомачната празнина зазема најголемо место, а притоа не се потпира на никаков цврст потпирач, желудникот е најподложен на пореметување на својата положба.
Проблем на родилките
Спуштениот желудник се јавува особено кај жени кои рано стануваат по породувањето. Со излегување на плодот и собирање на матката после породувањето се создава празнина во стомакот. Таа предизвикува изразено намалување на притисокот кој го одржува желудникот во нормална положба. Поради тоа доаѓа до истегање на желудникот и спуштање на неговите долни краеви кон малата карлица.
Исто така, тешка физичка работа и брзо слабеење и кај жените и кај мажите предизвикува губење на масното ткиво од стомачната шуплина. Тоа е, повторно, причина за намалување на притисокот што го одржува желудникот во нормална положба. На спуштање на стомачните органи делуваат и други причини, како што се нездрава исхрана, претерано внесување на храна одеднаш, лошо варење, неуредно празнење на цревата итн.
СИМПТОМИ
- Чувство на исполнетост и тежина во стомакот
- Лошо и бавно варење
- Ждригање
- Поспаност
Болните се најчесто нервозни, се плашат да јадат и слабеат. Овие лица по земање на течна храна или вода чувствуваат тежина, притисок и лупање во пределот на желудникот. Цврстата храна подобро ја поднесуваат.
Лекувањето на спуштен желудник обично трае подолг период и болниот треба да има трпение. При лекувањето на ова заболување треба да се делува, од една страна на стомачниот ѕид, а од друга страна на желудникот, и на крајот на целиот организам, особено на нервниот систем.
Како да делувате
На спуштен желудник поволно може да се делува со уредна исхрана и земање умерени количини на храна, без многу течности, со добро џвакање, уредно празнење на цревата и одмор по јадењето. Треба да се јаде храна која не предизвикува тегоби а тоа е, пред се, исхрана без зеленчук, супи, чорби. Лицата со спуштен желудник треба да избегнуваат земање вода за време и веднаш по јадењето, туку вода да пијат час – два пред јадење.
Превентивни мерки
Како и во многу други случаи, така и против оваа болест најважни се превентивните мерки. Поради тоа, на прво место треба да се влијае на децата, со разни вежби, пливање и други спортови што подобро да го зајакнат стомачниот ѕид. Треба да се навикнуваат на уредна и умерена исхрана. Жените за време на бременоста, доколку лекарот тоа го советува, треба да носат појас кој ќе им го придржува стомачниот ѕид и зголемениот стомак.
