Глумецот Вил Смит, добитник на награда за најдобра машка улога, ги изненади сите кои присуствуваа на овогодинешното доделување на наградите Оскар, но и оние кои настанот го следеа преку малите екрани, со својата реакција кога комичарот Крис Рок упати неумесна шега на сметка на изгледот на неговата сопруга Џејда Пинкет Смит која ја изгуби косата поради алопеција.
Алопеција ареата е често, обично бенигно хронично заболеување на косата кое предизвикува опаѓање на влакната од одредени делови на телото, најчесто на главата, односно темето.
Што предизвикува алопеција и како се лекува, објаснува д-р Јелена Штефков, дерматолог.
“На стручњаците се уште не им е целосно јасно зошто и по кој принцип се јавува алопецијата. Тие веруваат дека до опаѓање, односно губење на косата/влакната доаѓа поради развивање на еден вид имунолошка реакција и дека таа реакција може да ја поттикнат различни ризик фактори или т.н. фокуси – поради што кај пациентот се прават бројни испитувања. Меѓутоа, постојат случаи кога лекарите со споменатите испитувања често не можат да ја пронајдат можната причина за болеста. Лекувањето на алопеција ареата обично трае долго. Пациентот е на добар пат за опоравување доколку не се појавуваат нови жаришта и ако во постоечките растат нови влакна. Тоа е, се согласуваат експертите, многу добар знак“, појаснува докторката. И додава дека алопеција ареата почесто се јавува кај лица кои имаат зголемени антитела на штитната жлезда.
“Нема специфична терапија за алопеција ареата. Со разни антивоспалителни препарати (лосиони, креми, инјекции) се обидува да се стопира имунолошката реакција која довела до опаѓање на влакната, за да може да пораснат нови. Кога ширењето на жариштата и опаѓањето на косата е стопирано, тогаш се фокусира на подобрување на растот на нови влакна“, вели д-р Штефков.
На почетокот од растењето, влакната се секогаш тенки, меки и светли – како кај децата. По некое време тие преминуваат во “вистински“ или т.н. терминални влакна и добиваат на полност и колорација што им припаѓа.
