Варијантите како алфа, бета и делта земаа сериозен данок од нашето здравје и го зголемија ризикот од појава на други здравствени тегоби, но нивниот наслендик – омикрон, иако позаразен, се чини дека предизвикува поблаги инфекции. Освен тоа, и подваријантите на омикрон ВА.4 и ВА.5 станаа доминантни во многу делови во светот.
ШТО ТРЕБА ДА СЕ ЗНАЕ ЗА ПОДВАРИЈАНТИТЕ НА ОМИКРОН ВА. 4 И ВА.5?
Подваијантите на омикрон BA.4 и BA.5 првпат се откриени во Јужна Африка во јануари, односно февруари 2022 година. Тие моментално претставуваат најнова и најдоминантна верзија на омикрон, а Светската здравствена организација информираше дека BA.5 чини повеќе од половина од случаевите на инфекции во светот, додека кај подваријантата BA.4 се работи за нешто повеќе од еден од десет.
Експертите, пак, велат дека се работи за најзаразните варијанти, кои го избегнуваат претходно стекнатиот имунитет, но дека најчесто предизвикуваат поблага форма на инфекција.
ДАЛИ Е ПОКРАТОК ПЕРИОДОТ НА ИНКУБАЦИЈА СО НОВИТЕ ВАРИЈАНТИ?
Што се однесува до омикронските подваријанти BA.4 и BA.5, периодот на инкубација е уште една работа што дојде до израз кај нив. Значи, колку време е потребно за да се појават симптомите по изложувањето на новите подваријанти?
Д-р Алисон Арвади, од Одделот за јавно здравје во Чикаго, вели дека неодамнешните студии покажале дека периодот на инкубација за КОВИД-19 е скратен со порастот на новите варијанти и сега изнесува околу три дена.
Студија, објавена во списанието JAMA Network Open, проучила и анализирала 141 студија за да открие како периодот на инкубација за корона, што е време од кога ќе се заразите до моментот кога ќе почнат да се појавуваат првите симптоми, се променил од почетокот на 2020 година.
Истражувачите од Пекинг откриле дека со секоја нова варијанта, периодот на инкубација значително се намалува. Се вели дека варијантата омикрон има најкратка временска рамка помеѓу инфекцијата и почетокот на симптомите. „Периодите на инкубација за КОВИД-19 предизвикани од алфа, бета, делта и омикрон беа 5,00, 4,50, 4,41 односно 3,42 дена“, велат истражувачите.
ЗОШТО НЕКОИ ЕКСПЕРТИ СМЕТААТ ДЕКА ОВА Е “ДОБРА ВЕСТ“?
Д-р Арвади верува дека ова е “одлична вест“.
“Ова се одлични вести од гледна точка на контрола на болеста и затоа што еден од најголемите предизвици кај ковидот е тој дека, кога периодот на инкубација е долг, може да добиете ковид и потенцијално ќе помине долго време пред да забележите значајни симптоми, а вие ќе го ширите вирусот. Значи, добра вест е што се скратува периодот на инкубација“, вели таа.
Меѓутоа, според насоките на СЗО, периодот на инкубација за КОВИД-19 останува во просек од 5 до 6 дена, а може да се продолжи и на 14 дена.
КОИ СИМПТОМИ СЕ СЕГА ПРИСУТНИ?
“Се чини дека тие се променија малку сега кога подваријантата омикрон BA.5 е навистина доминантна. Се чини дека предизвикува помалку симптоми и може да биде поблага кај повеќето луѓе. Се разбира, постојат исклучоци и некои луѓе сè уште заболуваат од многу тешки форми на болеста. Можно е ВА.5 да предизвикува симптоми со помала количина на вирус и тоа би можело да ги објасни малку поблагите симптоми“, вели проф. Тим Спектор.
Како доминантни симптоми тој ги истакнува болката во грло и главоболката, а потоа следат затнат нос и сува кашлица. Останатите симптоми вклучуваат течење на нос, засипнат глас, кивање, замор, болки во мускулите и вртоглавица.
