Луѓето со многу длабоки брчки на челото би можеле да бидат во 10 пати поголема опасност да заболат или умрат од болести на срцето и крвниот систем, се вели во студијата на научниците од Тулуз. Тие наведуваат дека анализарањето на брчките сепак не е ефикасен начин за откривање на болести на срцето како вообичаен метод, односно тестирање на крвта и крвниот притисок.
Истражувањето во кое учествувале 3200 возрасни луѓе, траело две децении. Кога почнало испитаниците имале 32, 42, 52 и 62 години. Секој на почетокот добил оценка за постоечките брчки на челото.
Нулата значела дека челото е потполно мазно и без никакви брчки, а тројката дека брчките се бројни и длабоки. Востановено е дека луѓето со оценка еден се во малку поголема опасност од срцеви болести од оние со нула. Личностите со двојка или тројка имале за 10 пати поголем ризик. Советувано им е да го сменат стилот на живот, повеќе да вежбаат и поздраво да се хранат.
Студијата меѓутоа не дала потполно објаснување врз основа на што е изведен нејзиниот заклучок, но една од можните теории тоа го поврзува со затврднување на артериите како резултат на наталожен притисок, пишува Индепендент.
Ризикот од срцеви болести се зголемува со годините, но стилот на живот и медицинските интервенции можат да ја ублажат опасноста. Вистински предизвик е да се воочат факторите на ризик доволно рано за нешто да може да се смени. За конечна потврда на оваа студија потребно е да се спроведат уште истражувања.
