Со години пред да се појават, многу болести немаат никакви симптоми, а главно се откриваат на систематски или рутински преглед. Систематскиот преглед е комплетен превентивен преглед кој според препораката на Светската здравствена организација треба да се прави редовно – еднаш годишно или на секои две години. Почетната возраст за одење на систематски преглед не е одредена и наменет е за различни возрасни категории. Систематскиот преглед многу често ги поттикнува луѓето на позитивни промени во начинот на живот, со што во голема мера може да се спречи или стопира напредувањето на речиси сите болести.
ШТО ОТКРИВААТ
ЕКГ
Брза, едноставна и безболна метода за мерење на електричните импулси на срцето. Тестот им помага на лекарите да одредат евентуални нарушувања на срцевиот ритам, недоволно снабдување со кислород и крв до срцето и прекумерно задебелување на срцевиот мускул што може да биде последица од покачен срцев притисок. ЕКГ може да открие и кога срцевиот мускул е тенок или кога го нема бидејќи е надоместен со немускулно ткиво. Таквата состојба може да биде последица на срцев удар.
РЕНДГЕН НА СРЦЕ И БЕЛИ ДРОБОВИ
Рендгенската слика на градниот кош од напред и од страна ги покажува формата и големината на срцето, контурите на крвните садови на белите дробови и градниот кош. Лесно се видливи абнормална форма или големина на срцето и, на пример, наслаги на калциум во срцевото ткиво. Рендгенските снимки на градниот кош често откриваат процеси во пулмоналните крвни садови и течноста околу белите дробови. Приказот на крвните садови на белите дробови често е поважен за дијагноза отколку приказот на срцето. На пример, зголемувањето на пулмоналните артерии во близина на срцето и нивното стеснување во ткивото на белите дробови укажува на зголемување на десната комора.
УЛТРАЗВУК НА СТОМАКОТ
Рутинскиот преглед се сведува на преглед на органите на т.н. горен абдомен – црн дроб, билијарен систем, панкреас, слезина, бубрези, надбубрежни жлезди, ретроперитонеални крвни садови и вена порта. Можни се дополнителни испитувања, како што е преглед на протокот низ крвните садови на абдоменот со употреба на обоен и пулсен доплер. Со ултразвик може да се видат и бубрежни камења, абнормалности на структурата на црниот дроб и жолчните канали, жолчни камења или инфекција на жолчното кесе, а со преглед на крвните садови и степенот на атеросклероза и аневризмални промени.
УЛТРАЗВУК НА ПРОСТАТА, ДИГИТОРЕКТАЛЕН ПРЕГЛЕД И ПСА ОД КРВ
Со ултразвучниот преглед се добива слика на простатата која јасно ја покажува големината, структурата на простатата, присуството на јазол или циста, постоењето калцификати во простатата или некои други абнормалности на нејзината структура и состав. Покрај изгледот, структурата и големината на простатата, се разгледуваат и мочниот меур и бубрезите.
ЛАБОРАТОРИСКИ ИСПИТУВАЊА
Се мерат нивоата на гликоза, креатинин, билирубин, урати, ЦРП, вкупен и ХДЛ и ЛДЛ холестерол, триглицериди, калиум, натриум, калциум и урина. По добивање на наодите и мислење од интернист кардиолог можни се дополнителни прегледи, невролошки, уролошки и други. На пример, ако пациентот има покачено ниво на гликоза во крвта, зголемена тироидна жлезда и нејзини хормони, тој ќе биде упатен на тест за HbA1c (гликолизиран хемоглобин) и ултразвук на тироидната жлезда.
