Во моментов против КОВИД-19 во светот се вакцинира со неколку различни вакцини, а во нашата земја се врши имунизација со четири различни вакцини.
И додека во Македонија допрва треба да се почне со вистинска масовна имунизација, во Израел речиси целокупното возрасно население веќе ги има примено двете дози вакцина. Но, во зависност од тоа со која вакцина се вакцинирани првиот пат, граѓаните на втора доза треба да чекаат за период од три до 12 недели. Затоа и се поставува прашањето, колкава е ефикасноста на само една доза вакцина, односно колкава заштита пружа?
Студија, објавена во април која се уште чека рецензија, е базирана на податоци собрани од 375 илјади вакцинирани лица од Велика Британија. Со анализа на податоците, научниците откриле дека една доза Фајзер или АстраЗенека вакцина го намалува ризикот од развој на КОВИД-19 со симптоми за 72 проценти, а заштитата би требало да трае до 10 недели.
Авторите на студијата истакнуваат дека не треба да се одложува давањето на втората доза за повеќе од 10 недели, оти податоците покажуваат дека по тој период, нивото на антитела опаѓа. По втората доза Фајзер вакцина, нивото на заштита се зголемува на 90 проценти. Податоците за нивото на заштита по примена втора доза на АстраЗенека вакцината, се уште не се достапни.
Друга студија објавена во стручното списание Лансет, наведува дека една доза Фајзер вакцина кај дури 91 процент од случаевите, спречува хоспитализација во период од 28 до 34 дена од вакцинирањето. Една доза АстраЗенека вакцина, под исти услови, евикасна е кај 88 проценти од случаевите.
Кон тоа треба да се додаде и трета студија која открила дека веќе една доза Фајзер или АстраЗенека вакцина, доволна е да се преполови ширењето на симптоматскиот КОВИД-19 во рамките на домот.
Тогаш, колку точно штитат вакцините по само една доза?
Тој податок се разликува од вакцина до вакцина, во зависност од тоа кога е мерена ефикасноста и во какви услови. Но, ако се потпреме на податоците од клиничките студии кои компаниите ги предале на различните здравствени регулатори при барањето на одобрение за користење на вакцините, може да се направи следнава скала.
Една доза Фајзер вакцина дава барем 80 процентна заштита од развој на симптомаски КОВИД-19 и тоа 21 ден по вакцинирањето, како и 100 процентна заштита од хоспитализација и смрт.
Вакцината Модерна во исти услови дава баррем 80 процентна заштита од развој на симптоматски КОВИД-19, но не е јасно колку штити од хоспитализација и смрт, оти има премалку податоци.
Една доза АстраЗенека вакцина нуди заштита од над 70 проценти од симптоматски КОВИД-19, додека заштитата од болничко лекување е 100 процнети. Таа висока заптита трае до 90 дена по една доза, поради што во тој период треба да се прими и втора доза за заштитата да се продолжи.
