Некои стручњаци наведуваат дека мигрената почесто се јавува кај одреден тип на лица; кои се посебно интелегентни, амбициозни, темпераментни, чувствителни, со премногу обврски кои сакаат да ги завршат во краток рок, но тоа не е правило.
Стресот претставува важен фактор во појавата на мигренозни напади, а во литературата често се опишува и мигрена за време на викенд кога лицето може да се опушти, а кај некои потсвесниот механизам тоа не го дозволува.
Исто така, се опишуваат и промени на времето, особено при влажно време како еден од факторите кои влијаат на појавата на мигренозни напади, како и прекумерното изложување на жештини, односно студенило. Хормонското влијание кај жените често се споменува, но во последно време се опишуваат и одредени видови храна кои имаат влијание на појавата на мигрена, како зрели сирења, чоколадо, кафе, разни алкохолни пијалоци и осцилации на шеќерот во крвта особено при диетите за слабеење.
Сето ова, според лекарите, не треба да се земе како правило, бидејќи кај секој пациент е присутен различен фактор, односно комбинација од неколку фактори, кои и покрај деталните анализи не може точно да се утврди што го предизвикало нападот.
Мигрената е повторувачка главоболка и не е симптом на никоја друга болест. Болниот нема никакви симптоми меѓу нападите. Претходно се сметало дека почнува во пубертетот и завршува во менопауза кај жените и во педесеттите години кај мажите. Но, најновите истражувања покажуваат дека таа може да почне во детството и да трае до седмата деценија од животот. Повеќето лица кои боледуваат од мигрена, првиот напад го добиваат пред 20. година, а 1 од 8 пациенти пред 10. година од животот. Ретко мигрената прв пат се јавува по 50. година.
