Група јапонски научници следела 1 083 возрасни личности во период од пет години, кои биле поделени во три категории врз основа на тоа колку брзо јадат: „бавно“, „нормално“ и „брзо“. На почетокот на истражувањето учесниците пополниле прашалник на тема навики во исхраната, степен на физичка активност и општа здравствена состојба.
На почетокот на студијата никој од доброволците не пател од метаболен синдром, што значи дека никој од нив немал најмалку три од следниве фактори – вишок во пределот на стомакот, ниско ниво на ХДЛ холестерол, покачени триглицериди, покачен крвен притисок или шеќер во крвта. Лошите вредности на најмалку три од овие наведени критериуми укажуваат на покачен ризик од кардиоваскуларни болести и дијабетес, и со едно име оваа состојба се нарекува метаболен синдром.
Пет години подоцна кога повторно го пополнувале истиот прашалник се покажало дека кај 84 отсто од испитаниците се развил метаболен синдром, а судејќи според резултатите на студијата објавена во магазинот Circulation, повеќето биле од групата која изјавила дека „брзо јаде“. Личностите кои јадат „од нога“ имаат за 89 отсто поголем ризик од развој на метаболен синдром од оние кои јадат побавно. Но тоа не е се што го заклучиле научниците. Испитаниците од групата која јадела брзо во период од пет години добиле повеќе килограми, им се зголемил обемот на струкот и нивото на шеќер во крвта им било повисоко отколку на испитаниците кои навеле дека јадат побавно. Лекарите велат дека ова е поврзано со фактот дека на мозкот му е потребно некое време да го обработи фактот дека сте сити, а се додека тоа не се случи вие продолжувате да јадете.
„Кога луѓето јадат брзо тие продолжуваат да јадат и откако ќе престанат да чувствуваат глад“, вели доктор Такајуки Јамаи од Универзитетот во Хирошима, кој го водел ова истражување, и додава: „Исто така, кај личностите кои јадат брзо скоковите на нивоата на шеќер во крвта се значителни, а тоа може да доведе до инсулинска резистенција.“
