Едно е извесно, после породувањето ќе се чувствувате многу уморно. Без разлика дали сте имале болки со часови или сте се породиле со царски рез, ќе бидете уморни, ќе чувствувате болка во секој милиметар од телото. Ова е сосема нормално бидејќи до пред некој момент сте користеле мускули за кои не сте ни знаеле дека постојат.
Нема да почувствувате поврзаност веднаш. Многумина очекуваат магија при првиот допир на своето бебе. Но заморот, возбудата и хормоните си го прават своето. Дури после неколку часа ќе станете целосно свесни дека вашето мало чудо дошло на свет.
Болки по породувањето. Откако ќе се породите контракциите продолжуваат за да може плацентата да излезе од вашето тело. Овој процес е, исто така, болен, а болката постепено се смирува кога сè ќе заврши.
Вагиналното крвавење, исто така, се јавува по царски рез. Повеќето жени се изненадени кога после породување со царски рез ќе се соочат со вагинално крвавење. Тоа обично не е толку обилно како после вагинално породување, но трае подеднакво долго, од 4 до 6 недели.
Бебето сака постојано да цица. Сосема е нормално бебето да има потреба да „влече“ цело време. Истовремено тоа е најдобриот и најефикасен начин за воспоставување на доењето.
Поради напорот, но и хормоните кои сè уште беснеат, ќе се потите прекумерно. Обезбедете си влажни марамчиња и резервни пижами
И понатаму ќе изгледате бремено. Не можете да очекувате да излезете од болницата со тело на супермодел. Повеќето жени се шокирани од тоа колку е голем стомакот после породувањето. Матката постепено ќе се врати во првобитната состојба, кожата полека ќе се стегне и стомакот ќе се намали.
Главата на бебето ќе има чуден облик. Обликот на главата на бебето се формира неколку години, но веќе по неколку минути од раѓањето ќе почне да добива соодветна форма. Коските на черепот на бебето не се сраснати, за да може главата, која е во исто време е и најголема, да помине низ родилниот канал.
Очите ќе ви се затвораат, но нема да можете да престанете да гледате во бебето. Нема доволно силен замор што ќе ги одвои очите на мајката од нејзиното бебе. Ќе разгледувате колку коса има, какви очи, ќе го споредувате со партнерот, ќе му зборувате…
