Жените кои држат ригорозни диети и поради витката линија се на граница на потхранетост имаат поголем ризик да по 30. година ја изгубат и мускулната маса. Физичката неактивност дополнително го забрзува овој процес, но и старењето, разни повреди… Освен пропаѓање на мускулите, кое е видливо, а може да се зајакне со различни спортски активности, се јавуваат и пореметувања на ставот и држењето на телото.
Меѓу првите страдаат коските околу коленото, а кај жените кои имале едно или повеќе породувања доаѓа до слабеење на мускулите на дното на карлицата и длабоките абдоминални мускули, кои вооедно се одговорни и за стабилноста на долниот дел од грбот.
Со тек на време, слабоста на овие мускули доведува до нарушена контрола на карлицата, нарушен став на телото со изразено нагласена искривеност на долниот дел на грбот. На овој проблем може да влијае и носењето високи потпетици. Неправилното држење на телото и слабеењето на мускулите може да започне уште во училишната возраст како последица од носење на тешките училишни торби, неправилно седење во училишна клупа, користење мобилен телефон и седење на компјутер. Процесот на слабеење на мускулите стабилизатори кои се одговорни за зачувување на правилно држење на телото и стабилноста на одредени сегменти напредува во текот на животот бидејќи лошите навики на држење на телото кои се усвојуваат во училишната возраст обично се одразуваат и низ различни професионални активности.
Мускулниот дисбаланс кај лицата кои имаат нарушено држење на телото со тек на време доведува и до нарушен квалитет на држењето во одредени сегменти.
Таков пример е дискус хернијата при која во ‘рбетот на ниво на два пршлена и дискот со време доаѓа и до морфолошки промени и оштетување на тој сегмент.
Проблем на нарушено држење на телото и мускулен дисбаланс може да имаат и мажите, најчесто оние кои извршуваат професии како што се стоматолози, хирурзи, возачи и фризери, но сепак проблемите во долниот дел од грбот се позастапени кај жените.
Превентивата подразбира соодветна физичка активност како што се вежби за корекција на нарушеното држење на телото. Тие се индивидуално прилагодени на секој поединец по анализа на телесниот став. Сигнал дека мускулите ја губат масата и стануваат послаби може да биде секоја болка која се јавува при движење или по долга принудна положба на телото. Кај жените пример за тоа е миењето коса кое е проследено со отежнато и забавено исправање на трупот, или се јавува болка во вратот по долго седење на компјутер.
