Исфрлањето месо и млечни производи од исхраната стана многу популарно, па во последните десет години забележан е раст на бројот на вегани за 350%. Некои кон оваа исхрана се свртуваат од етички, други од помодни, трети од здравствени причини. Нутриционистите се сложни – ако е правилно избалансирана и добро осмислена, веганската исхрана може да донесе многу бенефити. Добро избалансираната веганска исхрана со помалку сол и преработени намирници може да доведе до намален ризик за болести на срцето и за дијабетес. Треба да се обрне внимание на внесот на железо, цинк и калциум, бидејќи тие помалку се внесуваат при веганскиот режим.
Еве што се случува во телото во текот на една година на веганска исхрана.
После неколку дена
Ако одлучите да станете веган, во прв момент ќе почувствувате прилив на енергија која доаѓа поради исфрлањето на месото и доминацијата на исхраната базирана на овошје, зеленчук и јаткасти плодови. Потребно е однапред да се размислува за оброците, за да се обезбеди константно одржување на нивото на енергијата.
По неколку недели
По неколку недели неконсумирање месо, ќе се случат промени во цревата, главно на подобро, иако не се исклучени ниту засилени гасови и надуеност бидејќи веганската исхрана има повеќе влакна и зголемен внес на јаглехидрати кои ферментираат во цревата и може да предизвикаат иритација.
Неколку месеци
По неколку месеци, кожата ќе ви биде почиста, но нивото на витамин Д можеби ќе опадне, бидејќи него најмногу го има во месото, рибата, млечните производи. Овој витамин е многу важен за коските, забите, мускулите, а недостатокот на витаминот Д е поврзан со заболувања на срцето, мигрена, депресија. Резервите се чуваат во телото само два месеци. Бидејќи телото го произведува благодарение на сонцето, не би било лошо веганската исхрана да ја започнете пред крајот на зимата.
Една година
Како се приближувате до една година, резервите на витамин Б12 веројатно се истрошени. Замор, губење здив, трнење на рацете и нозете, лошо помнење, се некои од симптомите дека ви недостасува витамин кој единствено може да се најде во животинските производи. Затоа е важно да го надоместите, во спротивно сите благодати за кардиоваскуларниот систем ќе исчезнат.
Неколку години
Долгогодишниот вегански режим може да остави трага на коските. За 30% се поголеми шансите веганите да скршат нога, отколку оние кои јадат месо или вегетаријанците, бидејќи е важен внесот на калциум, кој го има во брокулата и кељот, иако така внесен калциумот потешко се апсорбира.
