Меѓу многуте, како што тогаш се мислеше, спасоносни, а евтини и достапни терапии за борба против коронавирусот, се споменуваше и крвната плазма од лица кои прележале КОВИД-19. Уште во август 2020., американската Агенција за лекови и храна ја авторизираше терапијата со конвалесцентна плазма, а тогашниот претседател Доналд Трамп тоа го нарече историска пресвртница.
Плазма од лица кои прележале КОВИД-19 се собира и во Македонија. Но дали оваа терапија воопшто се применува кај нас? Од Министерството за здравство побаравме информации што се прави со овој вид плазма и колку дози воопшто досега се собрани. Овие се засега достапните информации.
Американската регулаторна агенција – ФДА пред една година издаде итно одобрение за користење на конвалесцентна плазма при лекување на болеста КОВИД-19. Оттаму утврдија дека “познатите и можни предности на тој производ ги надминува можните и потенцијални ризици кои ги ноди неговото користење“.
Според податоците од оваа агенција, над 70.000 пациенти се лекувани со таа плазма, насаната со користење на крв од лица кои се опоравиле од инфекција со коронавирусот.
На страната на Институтот за трансфузиона медицина и натаму стои повик за потенцијални донатори под мотото: ДА ГО ПОБЕДИМЕ КОВИД-19 – Дарувај плазма, спаси живот.
Истовремено, на страната на Институтот се споделени и критериуми за избор на дарители на крв, тромбоцитен концентрат и конвалсецентна плазма после вакцинација против КОВИД-19. Така, лица кои примиле вакцина против КОВИД-19 И И немале КОВИД-19 не можат да даруваат конвалесцентна плазма. Лица пак кои имале КОВИД-19 и примиле вакцина КОВИД-19 можат да даруваат конвалесцентна плазма (со валидно задоцнување, во зависност од видот на вакцината).
Со оглед дека досега не се изнесени никакви официјални податоци за резултатите со ваквиот третман на ковид болните, поставивме прашања дали заразените пациенти воопшто се лекуваат на ваков начин.
ПАНАЦЕА: Дали во земјава се уште се лекуваат пациенти со ковид со овој вид на терапија (конвалесцентна плазма) и дали се уште е во форма на студиска терапија (клинички студии како што беше и најавено)?
МИНИСТЕРСТВО ЗА ЗДРАВСТВО: Во нашата земја се уште се користи конвалесцентна плазма за третман на пациенти со Ковид болеста. Конвалесцентна плазма се уште во светски рамки се користи како истражувачки лек.
ПАНАЦЕА: Колку пациенти досега примиле и се лекувале со ваквата терапија и каков е исходот?
МИНИСТЕРСТВО ЗА ЗДРАВСТВО: Досега се издадени 2003 единици на конвалесцентна плазма а вкупно се собрани 2052. Податоците за терапискиот ефект на конвалесцентната плазма се внесуваат во EU CCP database (датабаза на Европска Унија за COVID-19 конвалесцентна плазма), а во светот се водат и многу други клинички студии регистрирани во WHO и clinical trials.gov, меѓу кои и нашата, од кои се очекува и официјална констатција за истата.
ПАНАЦЕА: Колкава е залихата на овој вид на плазма и дали се уште се дарува во Институтот за трансфузиона медицина?
МИНИСТЕРСТВО ЗА ЗДРАВСТВО: Институтот за трансфузиона медицина има 49 единици во резерви и се покриваат сите потреби за пациенти. Со појавување на новиот бран повторно е активирано дарувањето на конвалесцентна плазма со цел да се одржува нивото на резерви на задоволително ниво.
ПАНАЦЕА: Во кои се здравствени институции се применува конвалесцентна плаза како дел од терапијата за лекување на КОВИД-19?
МИНИСТЕРСТВО ЗА ЗДРАВСТВО: На почетокот на пандемијата и со воведувањето на конвалесцентна плазма во третман на пациенти со Ковид болест, овој вид на третман се користеше само при Универзитетска Клиника за Инфективни Болести но сега се користи во сите ковид центри во рамките на болниците ширум земјата.
