Кога на почетокот на јануари научник од Кипар прв пат зборуваше за комбинација на делта и на омикрон варијантите на коронавирусот, во светот завладеа голема возбуда, но набрзо се стиши: Грешка! Се работело за контаминација во лабораторија.
Два месеци подоцна во Европа и во САД сепак се откриени инфекции со комбинација на делта и омикрон. Засега не се работи за многу случаеви, но хибридната форма “делтакрон“ потсетува дека панедмијата ни одблиску не е готова – иако некои земји во меѓувреме во голема мера ги укинаа рестрикциите.
ПОТВРДА ЗА ХИБРИДНАТА ВАРИЈАНТА
“Сега е сосема јасно дека навистина се работи за варијанта делтакрон“, потврди Лука Чичин-Шаин, раководител на одделот за вирусна имунологија во Истражувачкиот центар за инфекции во Хелмхолц.
И Светската здравствена организација беше подготвена за појава на нова хибридна варијанта. “Позната ни е и оваа варијанта. Тоа е комбинација на делта AY.4 и омикрон BA.1“, изјави Марија ван Керхове, експерт на СЗО задолжен за коронавирусот. Таа додаде дека тоа е очекувано во услови кога низ светот циркулираат две варијанти на коронавирусот (делта и омикрон).
ДАЛИ ДЕЛТАКРОН Е ПООПАСНА ВАРИЈАНТА?
Делта е варијанта која кај многу луѓе предизвика потешка форма на болеста, а омикрон е уште позаразна верзија. Но, тоа не мора да значи дека нивната комбинација е поопасна.
Анализата на геномските секвенци што ја спровел францускиот институт Пастер покажува дека делтакронот навистина содржи карактеристични мутации на двете линии, објави генетската база на податоци Гисаид.
Од варијантата омикрон BA.1, делтакрон го превзела речиси целиот шилест spike протеин и го комбинирала со делови од варијантата AY.4.
Постои загриженост дека токму оваа позаразна хибридна варијанта сега може да се прошири, особено во оние земји каде што се ублажени рестрикциите. Така, пандемијата би можела да се продолжи и, благодарение на уделот на делта-инфекциите, би можела повторно да почне да предизвикува поголем број на тешки заболувања од КОВИД-19.
НЕМА ПРИЧИНИ ЗА ПАНИКА!
Но, повеќето експерти реагираат релативно опуштено на делтакрон. Досега само поединечни случаи се регистрирани во Германија, Франција, Холандија, Данска, Обединетото Кралство и САД. Ова сугерира дека новата хибридна варијанта можеби сепак не е толку опасна.
“Да беше варијанта што се шири многу побрзо и предизвикува тепки заболувања, тогаш во меѓувреме ќе имавме многу повеќе случаи“, објаснува имунологот Чичин-Шаин.
Слично мислење има и Етјен Симон-Лориер од Институтот Пастер, кој вели дека новата хибридна варијанта е сè уште исклучително ретка и не покажува знаци на експоненцијална експанзија. Во превод: новата варијанта не се шири со загрижувачко темпо. И американскиот лекар Пјер Кори вели дека нема причина за поголема загриженост.
КАКО Е СОЗДАДЕНА ДЕЛТАКРОН?
Фактот што експертите реагираат толку опуштено на појавата на делтакрон може да се оправда со фактот дека слични варијанти – рекомбинантен SARS-CoV-2, веќе се појавија во неколку наврати.
“Ова се случува кога се наоѓаме во преодна фаза помеѓу една доминантна варијанта кон некоја друга, тоа инаку е само еден научен куриозитет, ништо повеќе од тоа“, објаснува научникот Џефри Барет.
Вакви хибриди, таканаречени рекомбинанти, се формираат кога луѓето се инфицираат со две варијанти на коронавирусот во исто време. Ова, додуша, се случува доста ретко, но на крајот на минатата и почетокот на оваа година омикрон ја “собори“ делтата од тронот на доминантната варијанта. Можно е лицата кои истовремено биле во контакт со двете варијанти да се заразиле и со делта и со омикрон.
