Британскиот сој на коронавирус, поточно мутацијата В.1.1.7., потврден е и во Македонија. Овој сој во земјава е евидентиран кај 56 лица. Според информациите од Институтот за јавно здравје во текот на минатата недела биле пријавени 649 материјали кои биле секвенционирани за присуство на “британскиот” сој на SARS-CoV-2, по што е забележано дека британскиот сој на SARS-CoV-2 е присутен во осум градови, а најголем број случаи се откриени во Охрид (25), Прилеп (10) и Кавадарци (4).
Согласно анализите од МАНУ, во последниот период се детектирани поголем број на нови варијанти, кои претходно не биле присутни кај пациентите во земјава, што потенцираат од ИЈЗ, може да укажува на континуиран внес на нови случаи на КОВИД-19 од странство.
Британскиот сој побрзо се шири, позаразен и симптомите на инфекцијата со него делумно се разликуваат од почетното заболување со КОВИД-19.
Откако во декември 2020. година, нагло порасна бројот на новозаболени во југоисточна Англија, научниците воочија специфична варијанта на SARS-CoV-2, која по се почестото појавување, наречена е VOC-202012/01, односно B.1.1.7. до 15 јанураи 2021., новиот сој на коронавирусот е забележан во 52 држави, додека до денес се прошири во вкупно 75. Поради наглото ширење, се смета дека неговата преносливост е поголема од 40 до 70 проценти, поради што во Велика Британија во неколку наврати се воведени построги мерки.
Според студија, која вклучувала 6.000 заразени во Англија, заклучено е дека симптомите како кашлица, замор, главоболка и болка во мускулите се почести кај лицата заразени со новиот британски сој на вирусот. Сепак, губењето на осетот за мирис и вкус на нив помалку влијаат. Постојат докази, според британските медиуми, дека новиот сој може да биде и посмртоносен од останатите варијанти, но тоа се уште не може со сигурност да се потврди, иако првично беше кажано дека податоците од Велика Британија укажуваат на тоа дека смртноста може да биде поголема за 30 проценти.
Проф. Лоренс Јанг, виролог и професор по молекуларна онкологија на Универзитетот Варвик, вели дека новата варијанта на вирусот имала 23 промени во однос на изворниот вирус.
“Некои од промените во различни делови на вирусот може да влијаат на имунолошкиот одговор на телото и да влијаат на распонот на симптоми поврзани со инфекцијата“, заклучува тој.
Сите вируси се менуваат и мутираат, а мутациите означуваат промени во низата на нукелинската киселина. Иако некои се тивки, други можат да резултираат со нови протеини или промена на фенотипот на организмот. Сепак, коронавирусите побавно мутираат од многу други РНК вируси, поради постоењето на коректорски ензим, наведуваат од Американското здружение за микробиологија.
Во тек се лабораториски студии кои настојуваат да утврдат дали новите варијанти на вирусот имаат својства кои можат да ја променат ефикасноста на вакцините. Како што велат од СЗО, во моментов нема доволно податоци за тоа да се утврди.
“Веќе се покажа дека вакцината на Фајзер речиси целосно делува на британскиот сој, како и на вуханскиот оригинален вирус – изворната варијанта. Антителата кои се развиваат по вакцината или преболување на болеста ја ’покриваат’ и британската варијанта“, вели имунологот Златко Тробоњача.
“Има смисол да се вакцинира, бидејќи иако помала палета на антитела кои се создаваат нема комплетно да го неутрализираат вирусот, можеби човекот и ќе се разболи, но сигурно нема да биде силно и тешко – ќе биде избегнато тешко воспаление на белите дробови и други компликации, секако и смртен исход“, вели имунологот.
