Истражувањето на Институтот за динамика и самоорганизација во Гетинген покажува во која мера штитат маските и под кои услови на носење. Во ова истражување научниците го одредиле максималниот ризик од инфекции во бројни ситуации, земајќи предвид неколку фактори кои досега не биле вклучени во слични студии.
“Не ни помисливме дека на оддалеченост од неколку метри е потребно толку малку време да се апсорбира заразна доза од здивот на носителот на вирусот“, вели директорот на Институтот, Еберхард Боденшац, кој потсетува дека таквите среди и контакти се речиси неизбежни во училиштата, рестораните, клубовите, па дури и на отворен простор.
ФФП2 маските значајно го намалуваат ризикот од инфекција
Колку и да е висок ризикот од инфекција без заштита на устата и носот, студијата спроведена во Гетинген потврдува дека маските ФФП2 или KN95 се особено ефикасни во филтрирање на заразните честички од воздухот што се вдишува, особено ако се цврсто припиени за лицето. Докажано е дека ако и заразено и незаразено лиде носат добро припиени ФФП2 маски, максималниот ризик од инфекција по 20 минути контакт е малку поголем од еден на илјада, дури и на најмало растојание. Ако маските се лошо поставени, веројатноста за инфекција се зголемува на околу четири проценти.
Во случај на медицинските маски, вирусот најверојатно ќе се пренесе во рок од 20 минути со максимална веројатност од десет проценти.
“Во секојдневниот живот, вистинската веројатност за инфекција е сигурно 10 до 100 пати помала“, објаснува Боденшац.
Маските во училиште се многу добра идеја
При пресметувањето на ризикот од инфекција, тимот од Гетинген земал предвид бројни фактори кои претходно не биле вклучени во слични студии. Истражувачите на тој начин тестирале како лошото припивање на маската ја намалува заштитата и како тоа може да се спречи. Голамхосеин Багери, шеф на истражувачката група, објаснува дека во случаите кога работ на маската не е припиен (зелепен) на лицето, доминира ризикот од инфекција од воздухот што влегува и излегува низ рабовите на маската.
Иако деталната анализа на истражувачите од Гетинген покажува дека тесните маски FFP2 обезбедуваат 75 пати подобра заштита во споредба со хируршките маски и дека начинот на кој се носи маската прави голема разлика, дури и медицинските маски значително го намалуваат ризикот од инфекција во споредба со ситуации без никаква заштита за устата и носот.
“Затоа е многу важно луѓето да носат маски за време на пандемија. Нашите резултати уште еднаш покажуваат дека носењето маски во училиштата е општо многу добра идеја“, велат Багери и Боденшац.
