Здравствените агенции на Европската унија препорачаа втора бустер доза вакцина против КОВИД-19 за сите лица над 60 години поради порастот на бројот на заразени и хоспитализирани ширум Европа.
Иако постоечките вакцини и понатаму нудат добра заштита против хоспитализација и смртен исход, ефикасноста е намалена бидејќи вирусот еволуираше.
“Клучно е да сите над 60 години и сите чувствителни лица дојдат на втора бустер доза што е можно побрзо“, изјави еврокомесарката за здравство Стела Киријакидес.
Од април, здравствените агенции на ЕУ препорачуваат втора бустер доза само за оние над 80 години и за најранливите.
Новата препорака се очекува да ги олесни националните одлуки за забрзување на кампањите за вакцинација, кои се забавија речиси до застој во последниве месеци.
“Во моментов гледаме зголемени стапки на пријавени случаи на КОВИД-19 и растечки тренд на приеми и пополнетост во болниците и одделите за интензивна нега во неколку земји, главно поттикнати од подваријантата на омикрон ВА.5“, изјави д-р Андреа Амон, директор на Европскиот центар за контрола и превенција на болести, ЕЦДЦ.
Производителите на вакцини како што се Модерна и Фајзер тестираа верзии на нивните вакцини модифицирани за борба против варијантата на омикрон BA.1.
Иако тие рекоа дека тие вакцини генерирале добар имунолошки одговор против BA.1 и неодамна циркулирачките варијанти, тие забележале помал одговор против BA.4 и BA.5.
Европската агенција за лекови – ЕМА, која во моментов разгледува две вакцини прилагодени на варијантите, очекува првите вакцини од следната генерација да бидат одобрени до септември.
“Во меѓувреме, важно е да се разгледа користењето на моментално одобрените вакцини како втор бустер кај луѓето кои се најчувствителни“, изјави Емир Кук, извршен директор на Европската агенција за лекови.
Во земјава, од минатата недела по одлука на Комисијата за заразни болести и Националната комисија за имунизација, почна вакцинацијата со четврта доза на вакцина против КОВИД-19.
Четврта доза може да примат лицата над 18- годишна возраст, кои примиле три дози вакцина против КОВИД-19. За да примите втора бустер или четврта доза вакцина против КОВИД-19 не е потребно закажување, туку единствено треба да отидете на било кој од вакциналните пунктови во градот каде живеете.
“Вакцинацијата со четврта доза е предвидено да се спроведува со мРНА вакцина на „Фајзер“ или „Модерна“. Препорачаното растојание меѓу трета и четврта, односно бустер доза е најмалку четири месеци“, посочуваат од Министерството за здравство.
Вакцинацијата со четврта доза посебно се препорачува кај хронично болни, пациенти на дијализа, трансплантирани, онколошки пациенти, имунокомпромитирани и пациенти кои примаат имуносупресивна и имуномодулаторна терапија за која било индикација и кај лица над 60 години.
Во земјава, според информациите од ресорното министерство, има доволни количини вакцини, кои се безбедни и ефикасни.
