Појавата на камења во бубрезите е едно од најчестите заболувања на уринарниот тракт, а во 80 проценти од случаите се јавува кај мажи. Лицата од 20 до 40 години припаѓаат на ризичната група, а кога еднаш ќе се појави камен во бубрегот, постои поголема шанса болеста повторно да се појави и тие стануваат поподложни на други болести на уринарниот тракт, вклучувајќи болести на мочниот меур и воспаленија на уринарните патишта.
Појавата на камења во бубрезите се разликува според локацијата, па овие камења се препознаваат во бубрегот, уретерот и во мочниот меур. Симптомите се многу слични – нагла и остра болка во пределот на долниот дел на стомакот, често придружена со мачнина и повраќање, со видлива крв во урината, како и болка при мокрење.
Како и кај другите болести, правилната исхрана и доволната хидратација се многу важни и за зголемување, односно за намалување на ризикот од заболување од камен во бубрегот, како и за лекување.
Храна која го зголемува ризикот од камења во бубрезите
Здравјето на бубрезите е многу важно бидејќи е одговорно за детоксикација на телото, односно отстранување на метаболити и филтрирање на крвта. Затоа е важно да се намали внесувањето на следниве намирници кои го зголемуваат ризикот од појава на камења во бубрезите.
ЖИВОТИНСКИ ПРОТЕИНИ
Исхраната богата со животински белковини (односно протеини), како и со риба и морски плодови, може да поттикне создавање на камења.
МЛЕЧНИ ПРОИЗВОДИ
Млечните производи се слични на животинските протеини и прекумерното консумирање може да поттикне излачување на калциум преку урината, што е поврзано со поголемо формирање на камења во бубрезите.
КОФЕИН
Кофеинот не се наоѓа само во кафето, туку и во газираните сокови, енергетските пијалоци и чаевите, а ако не сте внимателни, на крајот може да дојде до прекумерна консумација на кофеин. Кофеинот може да влијае на појавата на камења во бубрезите бидејќи се зголемува нивото на калциум во бубрезите.
СОЛ
Ограничувањето на внесот на сол е важно не само за зачувување на нормалната функција на бубрезите, туку и за намалување на ризикот од други хронични болести, како што се срцевите заболувања. Според некои податоци во земјава, луѓето консумираат дури 12-16 грама сол, додека светските препораки се да се ограничи внесот на сол на максимум пет грама, а во случај на постоечки хронични заболувања се препорачува да се ограничи на 2-3 грама на ден.
Доколку камењата во бубрезите се појавени поради вишок калциум во организмот, се советува од исхраната да се исклучат намирници што содржат оксалати, како што се:
- цвекло
- Целер
- Магдонос
- Праз
- Интегрални житарки
- Овесни каши
- Пченични никулци
