Од почетокот на минатата недела во Скопје, на шест пункта низ градот, се почна со тестирање за новиот коронавирус со брзи антигенски тестови. Резултатите од тестот, кој го детектира само вирусот SARS-CoV-2, се готови за 10-15 минути.
Според објаснувањата од Министерството за здравство, брзото тестирање го закажува матичниот лекар преку Мој термин, според точно одреден алгоритам и еден од условите е симптомите на КОВИД-19 да не се присутни повеќе од пет дена од нивниот почеток до денот на тестирање. Но, доколку пациентот добие негативен резултат на брзиот тест, а сепак и натаму симптомите укажуваат на можност за инфекција со КОВИД-19, матичниот лекар може да го упати на дополнително ПЦР тестирање.
Антигенските тестови го откриваат евентуалното присуство на новиот коронавирус, но не даваат увид во тоа дали лицето ја прележало болеста и дали има антитела.
Во краток преглед ви донесуваме какви сè тестирања се спроведуваат за откривање и следење на новиот коронавирус и што тие значат .
АНТИГЕНСКИ ТЕСТ
Станува збор за тест кој изгледа слично како тест за бременост. Од лицето се зема брис од нос или од уста и се следи каков ќе биде резултатот кој е готов во рок од 15 минути. Со тој тест медицинскиот персонал може во краток рок да дознае дали некој пациент е инфициран, може лид а зарази други лица и во случај да е позитивен, веднаш да се изолира.
Овој вид на тест не ги докажува генетските секвенци на вирусот како што е случај кај РТ-ПЦР тестот, туку пронаоѓа протини кои укажуваат на вирусот.
За да биде ефикасен, лицето мора да има симптоми на КОВИД-19, а најголемиот недостаток на антигенските тестови е е сигурноста, односно чувствителноста, иако и тоа е подобрено од појавата на коронавирусот.
За тестот да препознае дали лицето е заболено,мора да има доволна количина од вирусот за да биде видлив, а обично кога пациентот има поголема количина од вирусот, има и симптоми. Антигенските тестови можат особено добро да ја препознаат инфекцијата кога количината на вирусот е на највисоко ниво. Тоа е воедно и моментот во кој заразените лица се најопасни и во стадиум во кој и најлесно и најмногу ја шират заразата, а тоа да не го знаат, бидејќи се асимптоматски. Кога ваков тест ќе даде позитивен наод, тоа значи дека тој навистина е таков, но ако даде негативен наод, тоа нужно не мора да значи дека резултатот е негативен (пациентот не се чувствува добро и јавува симптоми), па таквите пациенти се упатуваат на ПЦР тестирање.
ПЦР ТЕСТ
Како и за антигенскиот и за овој тест брисот се зема од нос и уста, но се работи за насигурен вид на тест. Детектира генетски материјал од вирусот во циклуси на анализа. Колку помалку циклуси се потребни за детекција, поголема е количината на вирусот во примерокот. Колку е поголема количината на вирусот, поверојатно е дека пациентот е инфициран.
Недостаток е што станува збор за преосетлив тест кој треба да биде земен во најпогоден момент, односно брисот не смее да се земе прерано.
Имено, се случува да лицето биде негативно на ПЦР тестот, но за неколку дена да се утврди дека сепак е заразено.
Ова е затоа што во првите денови по изложување на вирусот, помалку веројатно е откривањето на инфекцијата. Како се оддалечуваме од тој нулти ден од контакт со вирусот, така расте веројатноста тој да биде препознаен. Затоа и најголемата веројатност за откривање е кога ќе се појават првите симптоми. Дотогаш, тестот може да даде лажен негативен резултат. Недостаток на тестот е што на резултатите се чека од 24 до 48 часа и што резултатите мора да бидат обработени во лабораториски услови.
СЕРОЛОШКИ ТЕСТ
Станува збор за тест кој се добива со примерок од крв и ја покажува количината на антитела кај веќе заразените лица. Со него е можно да се види колкава била изложеноста на инфекцијата, да се утврди дали некој ја преболел болеста, а тоа да не ги ни знаел. Тестот открива присутност на антитела специфични за SARS-CoV-2 и кога лицето немало никакви симптоми на болеста. Така позитивниот наод на IgC антитела говори дека пациентот бил во контакт со вирусот, а позитивен наод на IgM антитела говори за моменталната инфекција. Обработката трае неколку часа.
